'குட் பேட் அக்லி' படத்தினைத் தொடர்ந்து அஜித்தின் அடுத்த படத்தினையும் ஆதிக் ரவிச்சந்திரன் இயக்கவுள்ளார். இது தொடர்பான அதிகாரபூர்வ அறிவிப்பு விரைவில் வெளியாகும் என்று பலரும் எதிர்நோக்கி உள்ள நிலையில், இந்த படத்தின் தயாரிப்பாளர் யார் என்பதில் தற்போது சிக்கல் எழுந்துள்ளது.

அஜித் - ஆதிக் ரவிச்சந்திரன் இணையும் 'ஏகே 64' படத்தினை ரோமியோ பிக்சர்ஸ் தயாரிப்பதாக இருந்தது. ஆனால், அஜித் தனக்கு ரூ.185 கோடி சம்பளம் என்பதில் உறுதியாக இருப்பதாக கூறப்படுகிறது. இதனால் ஒட்டுமொத்த தயாரிப்பு என்பது 300 கோடி வரை இருக்கின்ற நிலையில், அஜித்தின் சம்பள பிரச்சினையால் அதன் தயாரிப்பு பொறுப்பில் இருந்து ரோமியோ பிக்சர்ஸ் நிறுவனம் விலகியிருக்கிறதாக தகவல்கள் வெளியாகியுள்ளது.

இதனைத் தொடர்ந்து கோல்ட் மைன்ஸ் நிறுவனத்திடம் தயாரிப்பு குறித்து பேச்சுவார்த்தை நடத்தியிருக்கிறார்கள். அந்நிறுவனமும் இவ்வளவு பொருட் செலவில் படத்தினை தயாரித்து லாபம் ஈட்ட முடியாது என கூறி, விலகிவிட்டதாக தகவல் வெளியாகியுள்ளது. பின்னர், ஏஜிஎஸ் நிறுவனத்திடம் நடத்திய பேச்சுவார்த்தையில், அந்நிறுவனமும் ஆர்வம் காட்டவில்லை என்று செய்திகள் வெளியாகியுள்ளன.

ஏனெனில் அஜித்தின் சம்பளம் அதிகமாக இருப்பதால் இப்போது வரை 'ஏகே 64' படத்தின் தயாரிப்பாளர் யார் என்பது கேள்விக்குறியாக உள்ளது. இதனால் இப்போதைக்கு இப்படம் குறித்த அறிவிப்பு வெளியாக வாய்ப்பில்லை என கூறப்படுகிறது.