சுதா கொங்கரா இயக்கத்தில், நடிகர் சிவகார்த்திகேயன் முதன்மை கதாபாத்திரத்தில் நடித்துள்ள ‘பராசக்தி’ திரைப்படம் இன்று உலகம் முழுவதும் பிரமாண்டமாக வெளியாகியுள்ளது.

இதனை முன்னிட்டு, தமிழகம் முழுவதும் திரையரங்குகள் முன்பு ரசிகர்கள் பட்டாசு வெடித்து, பேனர்கள் ஏற்றி உற்சாகக் கொண்டாட்டத்தில் ஈடுபட்டுள்ளனர்.1960-களில் நடைபெற்ற இந்தி எதிர்ப்புப் போராட்டங்களை மையமாகக் கொண்டு உருவாக்கப்பட்டுள்ள இப்படம், அரசியல் விழிப்புணர்வும், மொழிப் பற்றும் நிறைந்த கதையமைப்பைக் கொண்டதாக பேசப்படுகிறது.

இதில் ரவி மோகன், அதர்வா, ஸ்ரீலீலா ஆகியோர் முக்கியமான கதாபாத்திரங்களில் நடித்துள்ளனர்.படத்திற்கு இசையமைத்துள்ள ஜி.வி.பிரகாஷ், தனது 100-வது திரைப்படமாக ‘பராசக்தி’யை உருவாக்கியுள்ளார்.

இதனை ஒட்டி, அவர் தனது எக்ஸ் (X) சமூக வலைதள பக்கத்தில் வெளியிட்டுள்ள பதிவில்,“நீண்ட காலத்துக்குப் பிறகு, நமது தாய்மொழியைப் போற்றியும் உயர்த்தியும் பேசும்

ஒரு திரைப்படம்.தமிழ் மீது கொண்ட பேரன்புடன், உங்களுக்காக ‘பராசக்தி’ என் 100வது திரைப்படம்” என்று உணர்ச்சிப்பூர்வமாக பதிவிட்டுள்ளார்.

தமிழ் மொழி, கலாசாரம் மற்றும் அரசியல் வரலாற்றை திரைமூலம் மீண்டும் நினைவூட்டும் இப்படம், ரசிகர்களிடையே பெரும் எதிர்பார்ப்பையும் பேசுபொருளாகவும் மாறியுள்ளது.