சினிமா மனிதர்களின் வாழ்க்கையில் பல்வேறு தாக்கங்களை ஏற்படுத்தும். சில திரைப்படங்கள் பொழுதுபோக்காக முடிந்து விடும்; சில படங்கள் சிந்திக்க வைக்கும்; அரிதாக சில படங்கள் மனிதர்களின் வாழ்க்கை முடிவுகளையே மாற்றும். அந்த வகையில், ஒரு தமிழ் திரைப்படம் பார்த்த பிறகு 38 விவாகரத்து வழக்குகள் வாபஸ் பெறப்பட்டுள்ளன என்ற தகவல் பலரையும் ஆச்சரியப்பட வைத்துள்ளது. அந்த அரிதான சாதனையை நிகழ்த்திய படம் தான் ‘இறுகப்பற்று’.

2023ஆம் ஆண்டு வெளியான இந்த திரைப்படத்தை யுவராஜ் தயாளன் இயக்கியுள்ளார். விக்ரம் பிரபு, ஷ்ரத்தா ஸ்ரீநாத் உள்ளிட்டோர் நடித்துள்ள இந்த படம், திருமண வாழ்க்கையின் நிஜமான சிக்கல்களை எந்த மிகைப்படுத்தலும் இல்லாமல் திரையில் பதிவு செய்தது. ‘இறுகப்பற்று’ என்ற சொல்லுக்கு “இறுக்கமாகப் பிடித்துக்கொள்” என்பதே பொருள். அதுபோலவே, உறவுகளை எளிதில் விட்டுவிடாமல் புரிதலுடன் பிடித்துக்கொள்ள வேண்டும் என்ற கருத்தை இப்படம் மையமாகக் கொண்டுள்ளது.

இந்த திரைப்படம், திருமண வாழ்க்கையின் வெவ்வேறு கட்டங்களில் இருக்கும் மூன்று தம்பதிகளின் கதைகளை மையமாக வைத்து நகர்கிறது.– வெளியில் அமைதியாகத் தோன்றினாலும், உள்ளுக்குள் அழுத்தங்களைச் சுமக்கும் தம்பதி,– காதலித்து திருமணம் செய்து கொண்டு, பின்னர் ஒருவரை ஒருவர் புறக்கணிக்கும் ஜோடி,
– மனைவியின் உடல் தோற்றத்தை காரணமாகக் காட்டி விவாகரத்து கேட்கும் கணவன்
என மூன்று விதமான உறவுச் சிக்கல்கள் இதில் பேசப்படுகின்றன.

திருமண ஆலோசகராக வரும் மித்ரா கதாபாத்திரம், மற்றவர்களின் பிரச்சனைகளுக்கு தீர்வு சொல்லும் போது, தனது சொந்த வாழ்க்கையிலும் சமநிலையை காப்பாற்ற முயற்சிக்கிறார். ரங்கேஷ் என்ற கதாபாத்திரம், மனைவி உடல் பருமன் அடைந்துவிட்டாள் என்பதையே விவாகரத்திற்கான காரணமாக முன்வைக்கிறான். ஆனால், படத்தின் ஓட்டத்தில் உண்மையான பிரச்சனை மனைவியிடம் அல்ல; அவனுடைய மனநிலையிலும், பார்வையிலும் தான் உள்ளது என்பது வெளிப்படுகிறது.

அதேபோல், திவ்யா – அர்ஜுன் என்ற காதல் தம்பதியின் கதை, திருமணத்திற்குப் பிறகு உருவாகும் மன அழுத்தம், உரையாடல் குறைவு, உணர்ச்சிப் புறக்கணிப்பு போன்ற நிஜ வாழ்க்கை பிரச்சனைகளை அழுத்தமாகப் பேசுகிறது. ஆலோசகரை நாடும் அர்ஜுன், இறுதியில் தனது தவறுகளை உணர்ந்து, உறவை மீட்டெடுக்க முயற்சிப்பது பலரின் வாழ்க்கையை பிரதிபலிப்பதாக அமைந்துள்ளது.

இந்த திரைப்படத்தின் தாக்கம் திரையரங்கத்தோடு நிற்கவில்லை. திருமண ஆலோசகர்கள் மற்றும் வழக்கறிஞர்கள் கூறுவதுபடி, ‘இறுகப்பற்று’ பார்த்த பிறகு 38 தம்பதிகள் தங்கள் விவாகரத்து வழக்குகளை வாபஸ் பெற்றுள்ளனர். எதற்கெடுத்தாலும் விவாகரத்து என்ற முடிவை எடுக்கும் மனநிலையை, இந்த படம் கேள்விக்குள்ளாக்கியதே இதற்குக் காரணம் என கூறப்படுகிறது.

மொத்தத்தில், ‘இறுகப்பற்று’ ஒரு பொழுதுபோக்கு படம் அல்ல.உறவுகளில் சிக்கிக்கொண்டிருப்பவர்கள்,விவாகரத்து குறித்து யோசிப்பவர்கள்,திருமண வாழ்க்கையின் அழுத்தங்களை புரிந்து கொள்ள விரும்புபவர்கள்எல்லோரும் கட்டாயம் பார்க்க வேண்டிய ஒரு வாழ்க்கைப் படம் என்றே இதனை சொல்லலாம்.சினிமா கெடுக்கும் என்பதற்கான கருத்துக்கு நேர்மாறாக, சினிமா உறவுகளை காப்பாற்றவும் முடியும் என்பதை நிரூபித்த படம் தான் ‘இறுகப்பற்று’.