இந்தியாவின் முன்னணி இருசக்கர வாகன உற்பத்தியாளர்களில் ஒன்றான டிவிஎஸ் மோட்டார் நிறுவனம், எலக்ட்ரிக் ஸ்கூட்டர் சந்தையில் புதிய அதிரடியாக மிகவும் மலிவு விலையில் கிடைக்கும் டிவிஎஸ் ஆர்பிட்டர் V1 (1.8 kWh) என்ற புதிய மாடலை அறிமுகப்படுத்தியுள்ளது. பொதுமக்கள் எளிதாக எலக்ட்ரிக் வாகனங்களை வாங்கும் வகையில் ‘பேட்டரி-ஆஸ்-எ-சர்வீஸ்’ (BaaS) என்ற புதிய திட்டத்தையும் நிறுவனம் அறிவித்துள்ளது.

இந்த திட்டத்தின் மூலம், டிவிஎஸ் எலக்ட்ரிக் ஸ்கூட்டரின் ஆரம்ப விலை ₹49,999 ஆக குறைக்கப்பட்டுள்ளது. இதில் வாடிக்கையாளர்கள் ஸ்கூட்டரை பேட்டரி இல்லாமல் வாங்கிக் கொண்டு, பேட்டரிக்காக தனியாக மாத சந்தா கட்டணம் செலுத்தும் வசதி உள்ளது. இதனால் ஆரம்ப செலவு குறைவதுடன், பேட்டரிக்கு நீண்டகால உத்தரவாதமும் கிடைக்கும். அதே நேரத்தில் BaaS திட்டம் இல்லாமல் முழுமையாக ஸ்கூட்டரை வாங்க விரும்பினால், இந்த மாடலின் விலை சுமார் ₹84,500 ஆக இருக்கும். இந்த விலை மாநிலங்களுக்கு ஏற்ப மாறக்கூடும்.

1.8 kWh பேட்டரி கொண்ட டிவிஎஸ் ஆர்பிட்டர் V1 ஸ்கூட்டர், ஒருமுறை முழுமையாக சார்ஜ் செய்தால் 86 கிலோமீட்டர் வரை செல்லும் என சான்றளிக்கப்பட்டுள்ளது. மேலும் இந்த பேட்டரியை 2 மணி 20 நிமிடங்களில் 0 முதல் 80 சதவீதம் வரை சார்ஜ் செய்ய முடியும்.

இந்த ஸ்கூட்டரில் நவீன தொழில்நுட்ப அம்சங்களும் இடம்பெற்றுள்ளன. மொபைல் ஆப் இணைப்பு வசதி, வைஸருடன் கூடிய எல்இடி ஹெட்லேம்ப், இன்கமிங் கால் தகவல்களை காட்டும் கலர் எல்சிடி கிளஸ்டர் போன்ற வசதிகள் இதில் வழங்கப்பட்டுள்ளன.

மேலும் 845 மிமீ நீளமுள்ள தட்டையான சீட், 290 மிமீ அகலமான கால்வைக்கும் இடவசதி, வசதியான ஹேண்டில்பார் போன்ற அம்சங்கள் பயணத்தை எளிதாக்கும் வகையில் வடிவமைக்கப்பட்டுள்ளன. சீட்டின் கீழ் 34 லிட்டர் சேமிப்பு வசதி இருப்பதால் இரண்டு ஹெல்மெட்களை எளிதாக வைக்க முடியும்.

இந்த புதிய அறிமுகத்தின் மூலம் டிவிஎஸ் ஆர்பிட்டர் வரிசையில் தற்போது V1 (1.8 kWh) மற்றும் V2 (3.1 kWh) என இரண்டு வேரியன்ட்கள் கிடைக்கின்றன. நகர்ப்புறங்களில் தினசரி பயணம் செய்பவர்களுக்கு குறைந்த விலையில் எலக்ட்ரிக் ஸ்கூட்டரை வழங்கும் முயற்சியாக இந்த புதிய மாடல் அறிமுகப்படுத்தப்பட்டுள்ளது.