தங்கத்தின் விலை எட்டாத உயரத்தில் பறந்து கொண்டிருக்க, மக்கள் பலர் தற்போது வெள்ளி பக்கம் திரும்பி வருகின்றனர்.
“தங்கம் கைவிட்டாலும், வெள்ளி கிடைத்தால் போதும்!” என்ற மனநிலையுடன் மக்கள் வெள்ளியை வாங்கி முதலீடு செய்து வருகிறார்கள்.ஆனால் இதில் ஒரு பெரிய ஆபத்து இருப்பதாக பொருளாதார நிபுணர் ஆனந்த் சீனிவாசன் எச்சரிக்கை விடுத்துள்ளார்.

கடந்த சில மாதங்களாக வெள்ளி விலை தங்கத்தை விட வேகமாக உயர்ந்து வருகிறது.கடந்த செப்டம்பர் 1ம் தேதி கிராமுக்கு ரூ.136 இருந்த வெள்ளி, தற்போது ரூ.206 வரை சென்றுள்ளது — அதாவது ஒரு மாதத்தில் 40% உயர்வு!
சென்னையில் நேற்று மட்டும் கூட வெள்ளி விலை கிராமுக்கு ரூ.9 உயர்ந்தது.

ஆனால், இதே நேரத்தில் ஆனந்த் சீனிவாசன் கூறுகிறார்:“வரலாற்றிலிருந்து பாடம் கற்றுக் கொள்ளாதவர்கள், அதே தவறை மீண்டும் செய்வார்கள். வெள்ளி விலையிலும் அதே விஷயம் நடக்கிறது!”

அவர் விளக்குகிறார் —1979ஆம் ஆண்டு, அமெரிக்காவில் ஒரு அவுன்ஸ் வெள்ளி 6.5 டாலர் இருந்தது. அப்போது “ஹண்டர் சகோதரர்கள்” எனப்படும் முதலீட்டாளர்கள் உலகம் முழுவதும் உள்ள வெள்ளியை வாங்கி வைத்தனர். இதனால் வெள்ளி விலை 1980ல் 49.50 டாலர் என்ற உச்சத்துக்கு சென்றது.

ஆனால் அதன் பிறகு?மார்கெட் திடீரென விழுந்து, விலை 4.5 டாலர் வரை சரிந்தது — அதாவது 90% வீழ்ச்சி!
45 ஆண்டுகள் கழித்தும், அந்த விலை மீண்டும் தாண்ட முடியாத நிலை தான்.

அதையே குறிப்பிட்டு ஆனந்த் சீனிவாசன் கூறுகிறார்:“சிலர் இப்போது 37% உயர்ந்தது பெரிது என்கிறார்கள். ஆனால் வரலாற்றில் 90% சரிந்ததும் உண்டு. 6 டாலரிலிருந்து 50 டாலருக்கு சென்றதும், மீண்டும் 5 டாலருக்கு சரிந்ததும் வெள்ளிதான். இதே மாதிரி மீண்டும் நடந்தால்? ரூ.35க்கு போக வாய்ப்பு இருக்கு!”அவர் மேலும் விளக்குகிறார்:

வெள்ளி என்பது ஒரு நாணயம் (Currency) அல்ல, ஆனால் தங்கம் ஒரு கரன்சி.அதனால் வெள்ளி விலை சரிய ஆரம்பித்தால் அதைத் தடுக்க யாரும் வரமாட்டார்கள்.“இந்திய ரிசர்வ் வங்கி வெள்ளியை வாங்காது, சீன மத்திய வங்கியும் வாங்காது. உலகின் எந்த மத்திய வங்கியும் வெள்ளியை ரிசர்வ் கரன்சியாக வைத்துக்கொள்ளாது. ஆனால் தங்கம் விலை சரிய ஆரம்பித்தால், சீனா, ரஷ்யா, இந்தியா எல்லாம் வாங்க ஆரம்பிக்கும். அதனால் தங்கத்திற்கு ஒரு ‘பாதுகாப்பு வலை’ உண்டு. ஆனால் வெள்ளிக்கு அது இல்லை.”

அதனால் அவர் எச்சரிக்கிறார் —“வெள்ளி விலை சரிய ஆரம்பித்தால், அதை நிறுத்த ஆள் இருக்க மாட்டார்! தங்கத்துக்கு ‘மத்திய வங்கி’ என்ற கடைசி வாங்குபவர் இருக்கிறார். ஆனால் வெள்ளிக்கு யாரும் இல்லை.”

வெள்ளி விலை இன்று பறக்கிறது என்பதற்காக அதில் முதலீடு செய்யும் முன் இருமுறை யோசிக்க வேண்டும்.
ஏனெனில், வெள்ளி உயர்ந்த வேகத்தில் ஏறும் — ஆனால் அதே வேகத்தில் கீழே விழவும் செய்யும்!

ஆனந்த் சீனிவாசனின் எச்சரிக்கை :“வெள்ளி மார்கெட்டில் லாபம் வேகமாக வரும்... ஆனால் அதைவிட வேகமாக ஆபத்து வரும்!”