இந்தியாவின் முன்னணி வாகன தயாரிப்பு நிறுவனமான Tata Motors, தனது என்ட்ரி-லெவல் எஸ்யூவியான Tata Punch-ன் புதிய ஃபேஸ்லிஃப்ட் மாடலுக்கான டெலிவரிகளை அதிகாரப்பூர்வமாக தொடங்கியுள்ளது. புதுப்பிக்கப்பட்ட வடிவமைப்பு, புதிய டர்போ பெட்ரோல் இன்ஜின் மற்றும் மேம்பட்ட பாதுகாப்பு, ஸ்மார்ட் அம்சங்களுடன் இந்த மாடல் சந்தைக்கு வந்துள்ளது.

புதிய டாடா பஞ்ச் ஃபேஸ்லிஃப்ட், ரூ.5.59 லட்சம் (எக்ஸ்-ஷோரூம்) ஆரம்ப விலையில் அறிமுகம் செய்யப்பட்டுள்ளது. பிரிஸ்டைன் ஒயிட், டேடோனா கிரே, சியான்டாஃபிக் ப்ளூ, பெங்கால் ரூஜ் உள்ளிட்ட பல நிறங்களில் கிடைக்கும் இந்த எஸ்யூவியில், வேரியன்ட் மற்றும் நிறத்தைப் பொறுத்து கருப்பு அல்லது வெள்ளை டூயல்-டோன் ரூஃப் தேர்வும் வழங்கப்படுகிறது. அங்கீகரிக்கப்பட்ட டாடா டீலர்கள் மற்றும் நிறுவனத்தின் அதிகாரப்பூர்வ இணையதளம் மூலம் முன்பதிவு செய்யலாம்.

இன்ஜின் தேர்வுகளில் முக்கிய மாற்றமாக, பஞ்ச் ஃபேஸ்லிஃப்ட்டில் இரண்டு பெட்ரோல் இன்ஜின்கள் வழங்கப்படுகின்றன. ஒன்று 1.2 லிட்டர் நேச்சுரல் அஸ்பிரேட்டெட் பெட்ரோல் இன்ஜின், மற்றொன்று முதல் முறையாக அறிமுகமாகும் 1.2 லிட்டர் டர்போ பெட்ரோல் இன்ஜின். இந்த டர்போ இன்ஜின் அதிக செயல்திறன் கொண்டதாக இருக்கும் என தெரிவிக்கப்படுகிறது. அட்வென்ச்சர் டிரிம்மில் இந்த டர்போ பெட்ரோல் வேரியன்டின் விலை ரூ.8.29 லட்சம் (எக்ஸ்-ஷோரூம்) முதல் தொடங்குகிறது. இது 6-ஸ்பீடு கியர்பாக்ஸுடன் வழங்கப்படுகிறது.

வடிவமைப்பில், புதிய பஞ்ச் தனது பாக்ஸி எஸ்யூவி தோற்றத்தை தக்கவைத்துக்கொண்டே, மெல்லிய LED டிஆர்எல்கள், புதிய LED ஹெட்லேம்ப்கள் மற்றும் மறுவடிவமைக்கப்பட்ட பம்பர் போன்ற மாற்றங்களை பெற்றுள்ளது. இதனால், முந்தைய மாடலை விட அதிகமாக ஸ்போர்ட்டியான மற்றும் மாடர்ன் லுக்கை இந்த ஃபேஸ்லிஃப்ட் மாடல் பெற்றுள்ளது.

உள்புற அம்சங்களில், இந்த செக்மெண்டில் குறிப்பிடத்தக்க அப்டேட்கள் செய்யப்பட்டுள்ளன. புதிய டாடா பஞ்சில் 360 டிகிரி கேமரா, பிளைண்ட் வியூ மானிட்டர், 10.24 இன்ச் டச் ஸ்கிரீன் இன்ஃபோடெயின்மென்ட் சிஸ்டம், வயர்லெஸ் சார்ஜிங் போன்ற அம்சங்கள் வழங்கப்படுகின்றன. பெட்ரோல் வேரியன்டில் 366 லிட்டர் பூட் ஸ்பேஸ் கிடைப்பதும் பயணிகளுக்கு கூடுதல் வசதியாக அமைந்துள்ளது.

பாதுகாப்பு அம்சங்களிலும் டாடா மோட்டார்ஸ் அதிக கவனம் செலுத்தியுள்ளது. புதிய பஞ்ச் ஃபேஸ்லிஃப்ட்டில் 6 ஏர்பேக்குகள், எலக்ட்ரானிக் ஸ்டெபிலிட்டி கன்ட்ரோல் (ESC), ஏபிஎஸ், டயர் பிரஷர் மானிட்டிங் சிஸ்டம் (TPMS) மற்றும் 360 டிகிரி கேமரா ஆகியவை ஸ்டாண்டர்டாக வழங்கப்படுகின்றன. கிராஷ் டெஸ்ட்களிலும் பஞ்ச் சிறப்பாக செயல்பட்டுள்ளதாக தெரிவிக்கப்படுகிறது.

2024 ஆம் ஆண்டில் இந்தியாவில் அதிகம் விற்பனையான கார்களில் ஒன்றாக டாடா பஞ்ச் இருந்தது. புதிய ஃபேஸ்லிஃப்ட், டர்போ இன்ஜின் மற்றும் மேம்பட்ட தொழில்நுட்ப அம்சங்களுடன், இந்த வெற்றியை வரும் காலத்திலும் தொடரும் என வாகனத் துறை வட்டாரங்கள் நம்பிக்கை தெரிவிக்கின்றன.