சொந்த வீடு என்பது அனைவருக்கும் ஒரே கனவு. அந்தக் கனவை நனவாக்க பலரும் பாடுபடுகின்றனர். ஆனால், வீடு அல்லது அடுக்குமாடி குடியிருப்பு வாங்கும் முன், சட்டப்படி கடைபிடிக்க வேண்டிய சில முக்கிய விஷயங்களைத் தெரிந்துகொள்வது அவசியம்.

முக்கியமாக, சொத்தின் மதிப்பு ₹50 லட்சம் அல்லது அதற்கு மேல் இருந்தால், டிடிஎஸ் (Tax Deducted at Source) செலுத்துவது கட்டாயம். இல்லையெனில், பதிவு நடைபெறாது; அபராதமும் விதிக்கப்படலாம்; மேலும், வருமான வரித்துறையிடமிருந்து நோட்டீஸ் வர வாய்ப்பும் உள்ளது.

பலருக்கு இந்த விதி தெரியாததால், பதிவு அலுவலகத்தில் சிக்கிக்கொள்ளும் நிலை ஏற்படுகிறது. வருமான வரிச் சட்டத்தின்படி, ₹50 லட்சம் மற்றும் அதற்கு மேல் மதிப்புள்ள சொத்தை வாங்கும்போது, விற்பனை மதிப்பின் 1% அளவிற்கு டிடிஎஸ் செலுத்த வேண்டும். இதைச் செலுத்துவது வாங்குபவரின் பொறுப்பு; விற்பவரோ, பதிவு அலுவலகமோ இதில் சம்பந்தப்படவில்லை.

பல மாநிலங்களில், டிடிஎஸ் செலுத்தியதற்கான ஆதாரம் இல்லையெனில், சொத்து பதிவு செய்யப்படுவதில்லை. வருமான வரித்துறைக்குத் தெரிய வந்தால், வட்டி மற்றும் அபராதமும் விதிக்கப்படும்.

டிடிஎஸ் செலுத்தும் முறை:

வருமான வரித்துறையின் இணையதளத்தில் உள்ள படிவம் 26QB-ஐ பூர்த்தி செய்ய வேண்டும்.இதில் விற்பவரின் பான் எண், சொத்தின் முகவரி, மொத்த மதிப்பு, வாங்குபவர் செலுத்திய தொகை போன்ற விவரங்களை வழங்க வேண்டும்.

நிகர வங்கி மூலம் ஆன்லைனில் செலுத்தலாம் அல்லது சலான் மூலம் வங்கியில் செலுத்தலாம்.செலுத்திய ஒரு வாரத்திற்குள் படிவம் 16B கிடைக்கும். அதை பதிவிறக்கம் செய்து விற்பவருக்கு வழங்க வேண்டும்.

காலக்கெடு:
பணம் செலுத்திய நாளிலிருந்து 30 நாட்களுக்குள் டிடிஎஸ் செலுத்த வேண்டும். உதாரணமாக, ஜூலை 10 அன்று பணம் செலுத்தினால், ஆகஸ்ட் 10க்குள் டிடிஎஸ் செலுத்தப்பட வேண்டும். தாமதமானால், வட்டி மற்றும் அபராதம் விதிக்கப்படும்.

₹50 லட்சத்துக்கு மேல் மதிப்புள்ள சொத்தை வாங்குவது ஒரு பெரிய முடிவு. அதனால், சட்ட விதிகளை பின்பற்றுவது வாங்குபவரின் பாதுகாப்புக்காக அவசியமானது. டிடிஎஸ் செலுத்துவது எளிதானது. ஆனால் அதை புறக்கணித்தால், பெரும் இழப்பு ஏற்படக்கூடும்.

மேலும் தெளிவான விளக்கங்களுக்கு, பட்டயக் கணக்காளர் அல்லது வழக்கறிஞரை அணுகுவது நல்லது என நிபுணர்கள் அறிவுறுத்துகின்றனர்.