அமெரிக்க அதிபர் டொனால்ட் டிரம்புக்கு அண்மையில் முழுமையான உடல்நல மதிப்பீடு மேற்கொள்ளப்பட்டது. பல்வேறு மருத்துவத் துறைகளைச் சேர்ந்த 22 நிபுணர்கள் இணைந்து இந்த விரிவான பரிசோதனையை நடத்தினர்.

உடலின் உள்பகுதி நிலைகளை துல்லியமாக அறியும் கதிர்வீச்சு படப்பிடிப்பு பரிசோதனைகள், இதய செயல்திறன் ஆய்வுகள், புற்றுநோய் கண்டறிதல் பரிசோதனைகள் மற்றும் பல்வேறு முன்னெச்சரிக்கை மருத்துவ மதிப்பீடுகள் இந்த ஆய்வில் இடம்பெற்றன.

சுமார் மூன்று மணி நேரத்திற்கும் மேலாக நடைபெற்ற மருத்துவ ஆய்வுகளின் முடிவுகள் தொடர்பான அறிக்கையை மருத்துவர் சீன் பார்பபெல்லா வெளியிட்டுள்ளார்.அந்த அறிக்கையின்படி, அதிபர் டிரம்பின் உடல் எடை தற்போது 108 கிலோவாக பதிவாகியுள்ளது.

இது கடந்த ஆண்டு ஏப்ரல் மாதத்தில் மேற்கொள்ளப்பட்ட மருத்துவ பரிசோதனையுடன் ஒப்பிடுகையில் சுமார் 6 கிலோ அதிகமாக இருப்பதாக தெரிவிக்கப்படுகிறது.

இதனைத் தொடர்ந்து, உணவுக் கட்டுப்பாடு, உடற்பயிற்சி நடைமுறை மற்றும் உடல் எடையை சமநிலைப்படுத்துவது தொடர்பாக மருத்துவ நிபுணர்கள் ஆலோசனைகளையும் வழிகாட்டுதல்களையும் வழங்கியுள்ளனர்.

அதே நேரத்தில், டிரம்பின் சிந்தனைத் திறன், நினைவாற்றல் மற்றும் உடல் செயல்பாட்டு திறன் சிறப்பான நிலையில் இருப்பதாக மருத்துவ அறிக்கையில் குறிப்பிடப்பட்டுள்ளது.

மேலும், அவரது உடல்நிலையில் கவலைக்கிடமான அல்லது அசாதாரணமான பாதிப்புகள் எதுவும் கண்டறியப்படவில்லை என்றும், இதயம், நுரையீரல், நரம்பியல் அமைப்பு உள்ளிட்ட முக்கிய உடல் உறுப்புகள் ஆரோக்கியமான செயல்பாட்டில் உள்ளதாகவும் தெரிவிக்கப்படுகிறது.

ஒட்டுமொத்தமாக, அமெரிக்க அதிபர் டிரம்ப் உறுதியான உடல்நலத்துடனும், சுறுசுறுப்பான செயல்திறனுடனும் உள்ளார் என மருத்துவ மதிப்பீட்டு அறிக்கையில் தெரிவிக்கப்பட்டுள்ளது.