பனாமாவில் ஏற்பட்ட சக்திவாய்ந்த 7.7 ரிக்டர் நிலநடுக்கத்தை ஒரு "பெரும் பேரழிவு" என்று அந்நாட்டின் அதிபர் ஜோஸ் ரவுல் முலினோ அதிகாரப்பூர்வமாக அறிவித்துள்ளார். நிலநடுக்கத்தின் அதிர்வுகளால் மையப்பகுதிக்கு அருகிலுள்ள சாலைகளும் கட்டடங்களும் கடுமையாகச் சேதமடைந்துள்ளன.

அதிபர் அறிக்கை: வெள்ளிக்கிழமை ஏற்பட்ட இந்த நிலநடுக்கம் பனாமாவின் கட்டமைப்புக்குக் கடும் சேதத்தை ஏற்படுத்தியுள்ளதாகத் தெரிவித்துள்ள அதிபர் முலினோ, நிலநடுக்க மையத்திற்கு அருகே முக்கிய சாலைகள் முற்றிலுமாக அழிந்துவிட்டதாகக் குறிப்பிட்டுள்ளார்.

பனாமா கால்வாய் இயக்கம்: அதிர்ஷ்டவசமாக, பசிபிக் மற்றும் அட்லாண்டிக் பெருங்கடல்களை இணைக்கும் சர்வதேச முக்கியத்துவம் வாய்ந்த பனாமா கால்வாயில் (Panama Canal) கப்பல் போக்குவரத்து எவ்வித தடங்கலுமின்றி வழக்கம்போல் இயங்கி வருகிறது.

வானளாவிய கட்டடங்களில் பீதி: தலைநகர் பனாமா நகரில் 20 மாடிகளுக்கும் அதிகமான உயரமுள்ள உயரமான கட்டடங்களின் மொட்டைமாடி நீச்சல் குளங்களில் இருந்து தண்ணீர் வழிந்து கொட்டிய காட்சிகளும், பாலம் கடுமையாகக் குலுங்கிய காட்சிகளும் சமூக வலைதளங்களில் வெளியாகிப் பெரும் பரப்பரப்பை ஏற்படுத்தின.

சுனாமி எச்சரிக்கை விலக்கல்: யு.எஸ்.ஜி.எஸ் (USGS) தொடக்கத்தில் இந்நிலநடுக்கத்தை 8.0 ரிக்டர் எனக் கணித்து, பின்னர் 7.7 எனக் குறைத்தது. கிழக்கு பசிபிக் கடலோரப் பகுதிகளுக்கு விடுக்கப்பட்ட சுனாமி எச்சரிக்கை ஆபத்து விலகியதைத் தொடர்ந்து திரும்பப் பெறப்பட்டது.