தெற்கு இலங்கைக்கு அருகிலுள்ள தென்மேற்கு வங்கக்கடல் பகுதிகளில் நிலவும் வளிமண்டல மேலடுக்குக் காற்று சுழற்சி காரணமாக, இன்று (நவம்பர் 23, ஞாயிற்றுக்கிழமை) தமிழ்நாடு முழுவதும் பரவலாக மழை பெய்யும் என்று எதிர்பார்க்கப்படுகிறது.

மிக கனமழை எச்சரிக்கை

இந்தக் காற்று சுழற்சியின் காரணமாக, பின்வரும் தென் மாவட்டங்களில் மிக கனமழை பெய்யக்கூடும் என இந்திய வானிலை ஆய்வு மையம் எச்சரித்துள்ளது:

தூத்துக்குடி
தென்காசி
திருநெல்வேலி
கன்னியாகுமரி

அரசு முன்னெச்சரிக்கை நடவடிக்கை

மிக கனமழை மற்றும் கனமழை எச்சரிக்கை விடுக்கப்பட்டுள்ளதால், தமிழக அரசு அனைத்து உரிய முன்னெச்சரிக்கை நடவடிக்கைகளையும் மேற்கொள்ளுமாறு தொடர்புடைய மாவட்ட ஆட்சியர்களுக்கு அறிவுறுத்தியுள்ளது.

மீட்புப் படைகள்: தமிழ்நாடு பேரிடர் மீட்புப் படையின் (TNDRF) இரண்டு அணிகள் தூத்துக்குடி மாவட்டத்திலும், ஓர் அணி திருநெல்வேலி மாவட்டத்திலும் மீட்பு மற்றும் நிவாரணப் பணிகளுக்காக முன்னெச்சரிக்கையாக நிலைநிறுத்தப்பட்டுள்ளன.

கண்காணிப்பு: கனமழை எச்சரிக்கை காரணமாக, மாநில அவசரகாலச் செயல்பாட்டு மையம் (SEOC) மூலம் நிலைமை தொடர்ந்து கண்காணிக்கப்பட்டு வருகிறது.

இந்நிலையில், நாளை தென்காசி, திருநெல்வேலி மாவட்டங்களுக்கு பள்ளி, கல்லூரிகளுக்கு விடுமுறை அளிக்கப்படுவதாக அந்தந்த மாவட்ட ஆட்சியர்கள் அறிவித்துள்ளனர். தூத்துக்குடியில் நாளை பள்ளிகளுக்கு மட்டும் விடுமுறை அளிக்கப்பட்டுள்ளது.