திருநெல்வேலி மாவட்டத்தின் தேவர்குளம் அருகிலுள்ள பன்னீர்ஊத்து காலனி தெருவில் வசித்து வந்த பொன்னம்பலம் - சுப்புத்தாய் தம்பதியின் குடும்பத்தில் அரங்கேறிய கொடூரம் கிராமமெங்கும் அதிர்ச்சியை ஏற்படுத்தியுள்ளது. இதில் 67 வயதான சுப்புத்தாய், தனது திருமணம் ஆகாத மகன் பொன்ராஜ் (31) உடன் வாழ்ந்து வந்தார்.

இரு மகள்கள் திருமணம் செய்து தனியாக வாழ்ந்து வருகின்றனர்.கட்டிடத் தொழிலாளியாக பணியாற்றும் பொன்ராஜுக்கும், அவரது தாயுக்கும் இடையே கடந்த சில நாட்களாக குடும்பத் தகராறு தீவிரமடைந்து, அடிக்கடி வாக்குவாதங்கள் வெடித்ததாக தெரிவிக்கப்படுகிறது.

இந்த பதற்றம் உச்சக்கட்டத்தை எட்டிய நிலையில், கடந்த 11ஆம் தேதி மதியம் வேலை முடித்து வீடு திரும்பிய பொன்ராஜ், தாயுடன் மீண்டும் கடுமையான சண்டையில் ஈடுபட்டுள்ளார்.

மேலும், ஆத்திரம் அடக்கமறந்து வெடித்த பொன்ராஜ், சுப்புத்தாயை தாக்கி கீழே தள்ளியதோடு மட்டுமல்லாமல், வீட்டில் இருந்த மண்ணெண்ணெயை அவரது மீது ஊற்றி தீ வைத்ததாக தெரிவிக்கப்படுகிறது. கண நேரத்தில் உடல் முழுவதும் தீ பரவிய சுப்புத்தாய் வேதனையில் அலறிய நிலையில், இந்த துயரக் காட்சியை பார்த்தவர்கள் பதறிப் போயினர்.

இந்த கொடூரச் சம்பவத்தில் பொன்ராஜின் கை, கால்களிலும் தீக்காயம் ஏற்பட்டது.அலறல் சத்தம் கேட்டு ஓடிவந்த அக்கம் பக்கத்தினர், தீக்காயங்களால் தவித்த இருவரையும் மீட்டு உடனடியாக பாளையங்கோட்டை அரசு மருத்துவமனைக்கு அனுப்பி வைத்தனர். அங்கு தீவிர சிகிச்சை அளிக்கப்பட்டும், சுப்புத்தாய் உயிரிழந்தது பேரதிர்ச்சியை ஏற்படுத்தியுள்ளது.

பொன்ராஜ் தற்போது மருத்துவ சிகிச்சையில் உள்ளார்.இந்த மனிதநேயத்தை உலுக்கும் சம்பவம் குறித்து தேவர்குளம் காவலர்கள் வழக்குப் பதிவு செய்து தீவிர விசாரணையில் ஈடுபட்டு வருகின்றனர். பெற்ற தாயையே உயிருடன் எரித்துக் கொன்ற இந்த பயங்கர சம்பவம், அந்த கிராமத்தை முழுவதும் சோகச் சாயலில் மூழ்கடித்துள்ளது.