இயக்குநராக தமிழ் சினிமாவில் அறிமுகமாக உள்ள ஜேசன் சஞ்சய், தனது முதல் திரைப்படமான ‘சிக்மா’ குறித்து மனம் திறந்து பேசியுள்ளார். மேலும், சினிமாவில் இயக்குநராக களமிறங்கும் தனது முடிவுக்கு குடும்பத்தினர் அளித்த ஆதரவு குறித்து நெகிழ்ச்சியுடன் பகிர்ந்துள்ளார்.

இதுகுறித்து பேசிய ஜேசன் சஞ்சய், “சினிமாவில் அறிமுகமாவது குறித்து அப்பா விஜய், அம்மா சங்கீதா, என் சகோதரி மற்றும் நண்பர்களிடம் பேசினேன். அனைவரும் எனக்கு முழு ஆதரவு தெரிவித்தனர். அப்போதுதான் அவர்கள் என் மீது எவ்வளவு நம்பிக்கை வைத்திருக்கிறார்கள் என்பதை உணர்ந்தேன்” என்று கூறினார்.

மேலும், இயக்குநராக தனது முதல் படைப்பான ‘சிக்மா’ திரைப்படத்தை சிறப்பாக உருவாக்க வேண்டும் என்ற எண்ணத்துடன் பணியாற்றி வருவதாகவும், இந்த வாய்ப்பை மிகப்பெரிய பொறுப்பாக கருதுவதாகவும் அவர் தெரிவித்துள்ளார்.

தந்தை விஜய் தமிழ் திரையுலகின் முன்னணி நடிகர்களில் ஒருவராக இருந்தாலும், தனக்கென ஒரு அடையாளத்தை உருவாக்கும் நோக்கில்தான் இயக்குநர் பாதையைத் தேர்வு செய்துள்ளதாகவும், தனது முயற்சிக்கு குடும்பத்தினர் மட்டுமின்றி நண்பர்களும் தொடர்ந்து உற்சாகம் அளித்து வருவதாகவும் ஜேசன் சஞ்சய் குறிப்பிட்டார்.

இந்நிலையில், ஜேசன் சஞ்சய் இயக்கும் முதல் திரைப்படமான ‘சிக்மா’ மீது ரசிகர்கள் மத்தியில் அதிக எதிர்பார்ப்பு நிலவி வருகிறது. படத்தின் கதை, நடிகர்கள் மற்றும் வெளியீடு தொடர்பான அடுத்தடுத்த அறிவிப்புகளை எதிர்நோக்கி ரசிகர்கள் காத்திருக்கின்றனர்.