சேலம் மேச்சேரி அருகே காவிரி ஆற்றில் அரங்கேறிய அதிர்ச்சிகர சம்பவம் பரபரப்பை கிளப்பியுள்ளது. சாக்கு மூட்டைக்குள் கட்டிப்போடப்பட்ட நிலையில் வாலிபர் ஒருவரின் சடலம் மீட்கப்பட்ட சம்பவம், அப்பகுதி மக்களிடையே பெரும் அதிர்வலைகளை ஏற்படுத்தியுள்ளது. கொலை செய்யப்பட்ட பின்னர் உடலை மறைக்க ஆற்றில் வீசப்பட்டிருக்கலாம் என்ற கோணத்தில் காவலர்கள் தீவிரமாக விசாரணை நடத்தி வருகின்றனர்.

மேச்சேரி அருகே கூனாண்டியூர் காவிரி ஆற்றுப் பகுதியில் துர்நாற்றம் வீசுவதுடன், சந்தேகத்திற்கிடமான வகையில் சாக்கு மூட்டையொன்று நீரில் மிதந்ததை அப்பகுதி மீனவர்கள் கவனித்துள்ளனர்.இதனால் சந்தேகமடைந்த அவர்கள் உடனடியாக சம்பவம் குறித்து காவலர்களுக்கு தகவல் தெரிவித்தனர்.

தகவல் கிடைத்தவுடன் சம்பவ இடத்திற்கு விரைந்து சென்ற காவலர்கள், ஆற்றில் மிதந்த சாக்கு மூட்டையை கரைக்கு கொண்டு வந்து திறந்து பார்த்தனர்.அப்போது அதற்குள் வாலிபர் ஒருவர் சடலமாக கிடந்ததை கண்டு அனைவரும் அதிர்ச்சியடைந்தனர்.முதற்கட்ட ஆய்வில், அந்த வாலிபர் கழுத்து நெரிக்கப்பட்டு கொலை செய்யப்பட்டிருக்கலாம் என்ற தகவல் வெளியாகியுள்ளது.

இதனால், மர்ம நபர்கள் அவரை திட்டமிட்டு கொலை செய்து, அடையாளம் தெரியாமல் இருக்க சாக்கு மூட்டையில் கட்டி ஆற்றில் வீசியிருக்கலாம் என சந்தேகிக்கப்படுகிறது.உயிரிழந்த வாலிபரின் அடையாளம் உடனடியாக தெரியாததால், அவர் எந்த பகுதியைச் சேர்ந்தவர்? எப்போது கொலை செய்யப்பட்டார்? யாருடன் தொடர்பில் இருந்தார்? என்ற கோணங்களில் விசாரணை தீவிரப்படுத்தப்பட்டுள்ளது.

உடலை மீட்ட காவலர்கள், பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர்.இந்த சம்பவம் தொடர்பாக கிராம நிர்வாக அலுவலர் அளித்த புகாரின் பேரில் வழக்குப்பதிவு செய்யப்பட்டுள்ளது.

கொலைக்கான காரணம் முன்விரோதமா? பணப் பிரச்சினையா? அல்லது வேறு ஏதேனும் பின்னணி உள்ளதா? என்பது குறித்து காவலர்கள் பல்வேறு கோணங்களில் தீவிர விசாரணை மேற்கொண்டு வருகின்றனர்.காவிரி ஆற்றில் சாக்கு மூட்டைக்குள் சடலம் மீட்கப்பட்ட இந்த சம்பவம் மேச்சேரி மற்றும் சுற்றுவட்டார பகுதிகளில் கடும் பரபரப்பை ஏற்படுத்தியுள்ளது.