திருச்சி சிந்தாமணி அருகே உள்ள அண்ணா சிலைக்கு, பேரறிஞர் அண்ணாவின் 117-வது பிறந்த நாளை முன்னிட்டு, தே.மு.தி.க. பொதுச்செயலாளர் பிரேமலதா விஜயகாந்த் தலைமையில் அக்கட்சியினர் மாலை அணிவித்து மரியாதை செலுத்தினர்.

பின்னர் நிருபர்களிடம் பேசிய அவர் கூறியதாவது:தமிழ்நாட்டில் தி.மு.க., அ.தி.மு.க. மற்றும் தே.மு.தி.க. ஆகிய மூன்று கட்சிகளுக்கே பூத் கமிட்டி உள்ளது.உச்ச நட்சத்திரங்களுக்கு மக்கள் கூட்டம் கூடுவது இயல்புதான்; அதை நாங்கள் 1990-களிலிருந்து பார்த்து வருகிறோம்.

விஜயகாந்திற்கும் பெருமளவு கூட்டம் கூடியது; அதேபோல் விஜய்க்கும் கூட்டம் கூடியுள்ளது.விஜய் அந்த கூட்டத்தை முறையாக ஒழுங்குபடுத்தியிருந்தால், இன்னும் சிறப்பாக செயல்படலாம்.தி.மு.க. மற்றும் பா.ஜ.க.வை விஜய் எதிர்த்து வருவதால், அவரை விமர்சிப்பது இயல்பானது.

விஜயகாந்த் கட்சி ஆரம்பித்த சில ஆண்டுகளிலேயே அதிக வாக்கு சதவீதம் பெற்றவர்; அவருடன் வேறு யாரையும் ஒப்பிட முடியாது.விஜய் குறித்து கேள்விகள் இருந்தால் அவரிடமே கேட்க வேண்டும். இனிமேல் கூட்டணி குறித்தும், விஜய் குறித்தும் என்னிடம் கேள்வி கேட்க வேண்டாம் என்று ஏற்கனவே தெரிவித்துள்ளேன்.

அனைத்து கட்சிகளும் எங்களது நண்பர்களே; கூட்டணி குறித்து முடிவெடுக்க இன்னும் நேரம் உள்ளது.விஜயகாந்த் இல்லாமல் நாங்கள் சந்திக்கும் முதல் தேர்தல் என்பதால், கட்சியின் வளர்ச்சியில்தான் முழு கவனம் செலுத்துகிறோம்.இவ்வாறு பிரேமலதா விஜயகாந்த் தெரிவித்தார்.