சாத்தான்குளம் வடுவே இன்னும் ஆறாத நிலையில், மானாமதுரை இளைஞர் ஆகாஷின் மரணம் தமிழகக் காவல்துறையின் மீதான நம்பகத்தன்மையை மீண்டும் கேள்விக்குறியாக்கியுள்ளது. திமுக ஆட்சியில் இதுவரை 37 லாக்-அப் மரணங்கள் நடந்துள்ளதாக பாஜக குற்றம் சாட்டும் வேளையில், இந்த வழக்கு புதிய திருப்பத்தைச் சந்தித்துள்ளது.

காவல்துறையின் 'கதை' vs நிதர்சனம்:
ஆகாஷ் தப்ப முயன்றபோது கீழே விழுந்து கால் முறிந்ததாகவும், பின்னர் மூச்சுத்திணறலால் உயிரிழந்ததாகவும் காவல்துறை கூறியது. ஆனால், "போலீசாரே என் காலை உடைத்தனர்" என ஆகாஷ் தனது ரிமாண்ட் வாக்குமூலத்தில் குறிப்பிட்டது ஆரம்பத்திலேயே காவல்துறையின் வாதத்தைச் சிதைத்தது.

உடற்கூராய்வு அறிக்கை - பகீர் உண்மைகள்:
தற்போது வெளியாகியுள்ள பிரேதப் பரிசோதனை அறிக்கை, இது ஒரு திட்டமிட்ட லாக்-அப் வன்முறை என்பதை ஆதாரப்பூர்வமாக உறுதிப்படுத்தியுள்ளது:

28 காயங்கள்: ஆகாஷின் உடல் முழுவதும் மொத்தம் 28 இடங்களில் காயங்கள் இருந்தன. எலும்பு முறிவு: வலது காலின் நடுப்பகுதியில் பலத்த எலும்பு முறிவு ஏற்பட்டுள்ளது.

மூளையில் ரத்தக்கசிவு: மிக முக்கியமாக, அவரது மூளையில் ரத்தக்கசிவு (Brain Hemorrhage) இருந்ததாக அறிக்கை கூறுகிறது.

:காலில் அடிபட்டவருக்கு மூச்சுத்திணறல் ஏற்பட்டதாகக் கூறிய காவல்துறையின் விளக்கம், மூளைக் கசிவு மற்றும் 28 காயங்கள் குறித்த செய்திகளை மறைத்திருப்பது அம்பலமாகியுள்ளது. காவல்துறையின் இந்தத் தொடர் அத்துமீறல்கள் பொதுமக்களிடையே பெரும் கொந்தளிப்பை ஏற்படுத்தியுள்ளன.