தமிழக அரசியல் களம் 2026 சட்டமன்றத் தேர்தலை முன்னிட்டு நாளுக்கு நாள் சூடுபிடித்து வரும் நிலையில், நடிகர் விஜய் தலைமையிலான தமிழக வெற்றி கழகத்தின் (தவெக) வாக்கு வங்கி குறித்து வெளியான புதிய கருத்துக்கணிப்பு அரசியல் வட்டாரங்களில் பரபரப்பை ஏற்படுத்தியுள்ளது. குறிப்பாக நாடாளுமன்றத் தேர்தலில் துல்லியமான கணிப்புகளை வழங்கியதாக கூறப்படும் ANS நிறுவனம் வெளியிட்டுள்ள புதிய சர்வே முடிவுகள் தவெக தொண்டர்களுக்கே அதிர்ச்சியை ஏற்படுத்தியுள்ளதாக கூறப்படுகிறது.

சினிமாவில் ஓப்பனிங் வசூலில் சாதனைகள் படைக்கும் விஜய், அரசியலில் தனது முதல் பெரிய தேர்தல் சோதனையை சந்திக்க உள்ளார். அவரது அரசியல் வருகை தமிழகத்தில் ஒரு பெரிய மாற்றத்தை உருவாக்கும் என ரசிகர்களும் ஆதரவாளர்களும் எதிர்பார்த்திருந்தனர். குறைந்தபட்சம் 15 முதல் 20 சதவீதம் வரை வாக்குகளை பெற்று, தமிழக அரசியலில் மூன்றாவது பெரிய சக்தியாக உருவெடுப்பார் என்ற நம்பிக்கையும் இருந்தது.

ஆனால் ANS நிறுவனம் வெளியிட்டுள்ள கருத்துக்கணிப்பின் படி, தமிழக வெற்றிக் கழகத்திற்கு தற்போது 9.7 சதவீதம் வாக்குகள் கிடைக்கலாம் என கணிக்கப்பட்டுள்ளது. இது 10 சதவீதத்திற்கும் குறைவாக இருப்பதால், தவெக அரசியல் பயணத்திற்கு இது ஒரு சவாலாக பார்க்கப்படுகிறது.

இந்த கருத்துக்கணிப்பில் ஆளும் திமுக கூட்டணி முன்னிலையில் இருப்பதாகவும் தெரிவிக்கப்பட்டுள்ளது. அதன்படி திமுக கூட்டணி சுமார் 44.9% வாக்குகளை பெறும் என கணிக்கப்பட்டுள்ளது. அதிமுக மற்றும் NDA கூட்டணி 38.5% வாக்குகளை பெறும் என கூறப்பட்டுள்ளது. நடிகர் விஜய்யின் தமிழக வெற்றிக் கழகம் 9.7% வாக்குகளையும், சீமான் தலைமையிலான நாம் தமிழர் கட்சி 4.8% வாக்குகளையும் பெறலாம் என தெரிவிக்கப்பட்டுள்ளது. மற்ற கட்சிகள் சேர்த்து சுமார் 2.1% வாக்குகள் பெறலாம் என கணிக்கப்பட்டுள்ளது.

பிப்ரவரி 7 முதல் மார்ச் 12 வரை தமிழகம் முழுவதும் நடத்தப்பட்ட ஆய்வின் அடிப்படையில் இந்த முடிவுகள் வெளியிடப்பட்டதாக ANS நிறுவனம் தெரிவித்துள்ளது.

அரசியல் விமர்சகர்கள் கூறுவதாவது, விஜய்யின் அரசியல் வருகை மிகப்பெரிய எதிர்பார்ப்பை உருவாக்கினாலும், கள நிலவரம் இன்னும் முழுமையாக அவருக்கு சாதகமாக இல்லை என்பதைக் காட்டுகிறது. குறிப்பாக திமுக மற்றும் அதிமுக போன்ற வலுவான கூட்டணிகள் இருக்கும் சூழலில் தவெக தனித்து போட்டியிடுவது சவாலாக மாறியுள்ளது.

மேலும் மாவட்ட அளவில் வலுவான கட்சி கட்டமைப்பு, கிளை அமைப்புகள் மற்றும் வாக்குச்சாவடி முகவர்கள் அமைப்பது போன்ற பணிகளில் தவெக இன்னும் முழுமையாக வலுப்பெறவில்லை என்பதும் அரசியல் ஆய்வாளர்கள் குறிப்பிடும் முக்கிய காரணமாகும். அதேபோல் இளைஞர்கள் மற்றும் ரசிகர்களைத் தாண்டி குடும்பத் தலைவிகள், நடுநிலை வாக்காளர்கள் போன்ற பெரிய வாக்கு வங்கிகளை ஈர்க்கும் அரசியல் கொள்கைகள் இன்னும் மக்களிடம் முழுமையாக சென்றடையவில்லை என்றும் கூறப்படுகிறது.

எனினும் 9.7 சதவீதம் என்பது ஒரு ஆரம்பம் மட்டுமே என்றும், தேர்தல் களத்தில் நடைபெறும் பிரச்சாரங்கள் மற்றும் புதிய அரசியல் அறிவிப்புகள் இந்த நிலையை மாற்றக்கூடும் என்றும் அரசியல் பார்வையாளர்கள் மதிப்பிடுகின்றனர். விஜய்யின் அரசியல் பயணத்தில் அடுத்த கட்டத்தில் என்ன மாற்றங்கள் நிகழும் என்பதையும், இந்த தேர்தலில் அவர் எந்த அளவுக்கு தாக்கத்தை ஏற்படுத்துவார் என்பதையும் காலமே தீர்மானிக்க வேண்டியுள்ளது.