தமிழக சட்டமன்றத் தேர்தல் களம் அதன் உச்சகட்டத்தை எட்டியுள்ள நிலையில், தமிழக வெற்றிக் கழகத்தின் (தவெக) தலைவரும், முதலமைச்சர் வேட்பாளருமான விஜய் இன்று (ஏப்ரல் 12, 2026) கன்னியாகுமரி மாவட்டத்தில் தனது பிரம்மாண்ட தேர்தல் பிரச்சார ரோடு ஷோவை நடத்துகிறார்.

ஏற்கனவே கடலூர் மற்றும் கும்மிடிப்பூண்டி பிரச்சாரங்கள் பாதுகாப்பு காரணங்களால் ரத்து செய்யப்பட்டிருந்த நிலையில், குமரி மாவட்டப் பயணம் தவெக தொண்டர்களிடையே பெரும் எதிர்பார்ப்பை ஏற்படுத்தியுள்ளது.

தேர்தல் ஆணையத்தின் முறையான அனுமதி பெறப்பட்டுள்ள இந்த ரோடு ஷோ, இன்று மதியம் 2:00 மணிக்கு கன்னியாகுமரி மகாதானபுரம் சந்திப்பில் (Mahadanapuram Junction) தொடங்கி, நகரின் முக்கிய வீதிகள் வழியாகச் சென்று 'ஜீரோ பாயிண்ட்' (Zero Point) பகுதியில் நிறைவடைகிறது.

இதற்காகத் திறந்தவெளி வாகனத்தில் வந்து விஜய் வாக்கு சேகரிக்க உள்ளார். குமரி மாவட்டத்தில் தவெக சார்பில் போட்டியிடும் வேட்பாளர்களை அறிமுகம் செய்து வைப்பதோடு, தென் மாவட்டங்களில் கட்சியின் செல்வாக்கை நிலைநாட்டும் வகையில் விஜய்யின் உரை அமையக்கூடும் என எதிர்பார்க்கப்படுகிறது.

கூட்ட நெரிசல் மற்றும் பாதுகாப்பு கருதி, தவெக தலைமையகம் பல்வேறு கட்டுப்பாடுகளை விதித்துள்ளது. குறிப்பாக, விஜய்யின் பிரச்சார வாகனத்தை இருசக்கர வாகனங்களிலோ அல்லது மற்ற வாகனங்களிலோ பின்தொடரக் கூடாது என்று தொண்டர்களுக்குக் கடும் உத்தரவு பிறப்பிக்கப்பட்டுள்ளது.

மேலும், கோடை வெயிலின் தாக்கம் அதிகமாக இருப்பதால் முதியவர்கள், கர்ப்பிணிப் பெண்கள், குழந்தைகள் மற்றும் உடல்நலக் குறைபாடு உள்ளவர்கள் நேரில் வருவதைத் தவிர்த்து, சமூக வலைதளங்கள் வாயிலாகப் பிரச்சாரத்தைக் காணுமாறு கட்சி பொதுச்செயலாளர் என். ஆனந்த் வேண்டுகோள் விடுத்துள்ளார்.

குமரி முனையில் தொடங்கும் இந்தப் பிரச்சார அலை, மாநிலம் முழுவதும் எதிரொலிக்கும் எனத் தவெகவினர் நம்பிக்கையுடன் உள்ளனர். காவல்துறையினர் பாதுகாப்புப் பணியில் ஈடுபடுத்தியுள்ளனர்.