கரூர் துயரச் சம்பவத்திற்குப் பிறகு நடிகர் விஜயின் தமிழக வெற்றிக் கழகம் கட்சிக்குள் எதிர்பாராத முறையில் உள் அரசியல் நெருக்கடி வெடித்து, கோஷ்டி மோதல்கள் தீவிரமாகி வருவதாக தகவல்கள் தெரிவிக்கின்றன. வளர்ந்து வரும் புதிய கட்சிக்குள் அதிகாரப் போட்டி வேகமாக தலைதூக்கி, விஜய்யின் தலைவலியை அதிகரித்துள்ளது என்றே கூறப்படுகிறது.

கட்சியின் பொதுச்செயலாளராக உள்ள புஸ்ஸி ஆனந்த், கட்சியின் ஆரம்ப கட்டத்தை முழுமையாகக் கட்டுப்படுத்தியவர். மாவட்ட செயலாளர்கள் முதல் முக்கிய பொறுப்புகள் வரை அனைத்தும் ஆனந்தின் தாக்கத்தில் தான் அமைந்ததாகவும், பதவிகள் பணம் வாங்கி வழங்கப்பட்டன என்ற குற்றச்சாட்டுகளும் எழுந்தன. விஜய்–தொண்டர்கள் இடையே “தடுப்புச் சுவர்” போல் ஆனந்த் நடந்துகொண்டார் என்பதும் அப்போது பேசப்பட்டது.

இதற்கிடையில், அனுபவமுள்ள ஆதவ் அர்ஜுனா மற்றும் முன்னாள் பாஜகத் தலைவர் சி.டி.ஆர். நிர்மல்குமார் தவெகவில் இணைந்ததும், கட்சிக்குள் அதிகாரச் சமநிலை முற்றிலும் மாற்றமடைந்தது. விஜய் இருவருக்கும் நேரடியாக மாநிலப் பொறுப்புகள் வழங்கியதால், ஆனந்தின் தாக்கம் குறைந்தது.

ஆதவ் அர்ஜுனா கட்சியில் பல அமைப்பு மாற்றங்களை கொண்டு வந்தார். நிர்மல்குமார் ஊடகங்களில் தவெகின் முக்கிய முகமாக மாறினார். இதனால் அவர்களுக்கான செல்வாக்கு அதிகரிக்க, ஆனந்துக்கு மனக்கசப்பு ஏற்பட்டதாக உள்ளக வட்டாரங்கள் தெரிவிக்கின்றன.

இந்த நிலையில் வியூக நிபுணர் ஜான் ஆரோக்கியசாமி சேர்வதும், கட்சிக்குள் அதிகாரச் சமநிலையை இன்னும் சிக்கலாக்கியது. ஆனந்துக்கு எதிராக சர்ச்சையான ஆடியோ வெளியாகி, “ஆனந்த் எதிர்ப்பு” அதிகரித்தது. கரூர் சம்பவத்திற்குப் பிறகு விஜய், பொறுப்புகளை ஒரே நபர் கையில் வைக்காமல் பல்வேறு தலைவர்களுக்கு பிரித்தளித்தது உள் மோதலை வேகப்படுத்தியது.

கட்சி நிர்வாகிகள் கூறுவதாவது:“முன்பு எல்லாம் ஆனந்தின் கட்டுப்பாட்டில் இருந்தது. இப்போது பொறுப்புகள் பிரிக்கப்பட்டதால், யார் ஆதிக்கம் செலுத்தப் போகிறார்கள் என்ற போட்டி உருவாகிவிட்டது. மாவட்டச் செயலாளர்களை தங்கள் பக்கம் திருப்ப ஆதவ் அர்ஜுனா, நிர்மல், ஜான் ஆகியோருக்குள் மௌனப் போராட்டம் நடக்கிறது. தவெக தற்போது யார் கட்டுப்பாட்டுக்குள் என்ற உள் அரசியல் மோதலில் மாட்டிக்கொண்டுள்ளது.”

விஜயின் புதிய அரசியல் பயணத்தில் இது மிகப் பெரிய சவாலாக மாறி வருகிறது.