தாராபுரம் இடைத்தேர்தல் பிரச்சாரத்தின்போது திமுக தலைவர் மு.க.ஸ்டாலின், தவெக வேட்பாளர் சத்யபாமா குறித்து உருவகேலி செய்ததாக சர்ச்சை எழுந்துள்ள நிலையில், அரசியல் கட்சித் தலைவர்கள் பலரும் தங்களது கருத்துகளை தெரிவித்து வருகின்றனர். இந்த நிலையில், யாராக இருந்தாலும் உருவகேலி செய்வதை தவிர்க்க வேண்டும் என்று பாமக சட்டமன்றக் குழுத் தலைவர் சௌமியா அன்புமணி தெரிவித்துள்ளார்.

தூத்துக்குடி மற்றும் நெல்லை மாவட்டங்களில் பல்வேறு நிகழ்ச்சிகளில் பங்கேற்பதற்காக தூத்துக்குடி விமான நிலையம் வந்த சௌமியா அன்புமணி, அங்கு செய்தியாளர்களை சந்தித்தார். அப்போது தாராபுரம் தேர்தல் பிரச்சாரம் குறித்த கேள்விக்கு பதிலளித்த அவர், தேர்தல் பிரச்சாரங்களில் தனிநபர்களை இழிவுபடுத்தும் வகையிலான கருத்துகள் இடம்பெறக் கூடாது என்று கூறினார்.

“யாரையும் நாம் உருவகேலி செய்யக்கூடாது. அவரது பேச்சில் எத்தனையோ நல்ல தகவல்கள் இருந்தன. ஆனால், கடைசியில் அவர் பேசிய ஒரு வார்த்தையால் அந்த நல்ல தகவல்கள் அனைத்தும் தெரியாமல் போய்விட்டன. அந்த ஒரு வார்த்தையே ஒட்டுமொத்த பேச்சின் சாரம்சத்தையும் மாற்றிவிட்டது. உருவகேலி என்பது யாராக இருந்தாலும் கண்டிப்பாக செய்யக்கூடாது” என்று சௌமியா அன்புமணி தெரிவித்தார்.

இதனிடையே, தமிழகத்தில் மது ஒழிப்பை வலியுறுத்தி பாமக சார்பில் ‘மது இல்லாத தமிழகம்’ இயக்கம் தொடங்கப்பட்டுள்ளதாக அவர் கூறினார். மது ஒழிப்பை வெறும் பெயரளவிலான கொள்கையாக இல்லாமல், படிப்படியாக மதுக்கடைகளை மூடும் வகையில் நடைமுறைப்படுத்த வேண்டும் என்றும் வலியுறுத்தினார்.

தமிழகத்தில் நீண்ட காலமாக மதுப்பழக்கத்தால் பாதிக்கப்பட்டுள்ள மக்களை மீட்பதற்கான நடவடிக்கைகள் மேற்கொள்ளப்பட வேண்டும் என்றும், அடுத்த தலைமுறையினர் மதுப்பழக்கத்திற்கு ஆளாகாமல் பாதுகாப்பது முக்கியம் என்றும் சௌமியா அன்புமணி கூறினார். மது மற்றும் போதைப்பொருள் ஒழிப்பு நடவடிக்கைகள் பெண்களின் பாதுகாப்புடன் நேரடியாக தொடர்புடையவை என்றும் அவர் தெரிவித்தார்.

தவெக அரசு ஆட்சிக்கு வந்து 100 நாட்களை கடந்துள்ள நிலையில், அரசு மேற்கொண்டுள்ள சில நடவடிக்கைகளையும் சௌமியா அன்புமணி வரவேற்றார். குறிப்பாக 717 மதுக்கடைகள் மூடப்பட்டிருப்பதை வரவேற்பதாக கூறிய அவர், பெண்களின் பாதுகாப்புக்காக கொண்டு வரப்பட்டுள்ள ‘சிங்கப்பெண்’ சிறப்பு படை போன்ற நடவடிக்கைகளையும் பாராட்டினார்.

மேலும், லஞ்சம் மற்றும் ஊழலை கட்டுப்படுத்த அரசு எடுத்துவரும் நடவடிக்கைகளையும் வரவேற்பதாக அவர் தெரிவித்தார். அரசின் செயல்பாடுகளை தொடர்ந்து கண்காணித்து வருவதாகவும், மக்களுக்கு பயனளிக்கும் நடவடிக்கைகள் மேற்கொள்ளப்பட்டால் அவற்றை வரவேற்பதில் எந்த தயக்கமும் இல்லை என்றும் அவர் கூறினார்.

இதனிடையே, தாராபுரம் இடைத்தேர்தல் பிரச்சாரம் குறித்து பேசிய அவர், தற்போது தேர்தல் களம் பரபரப்பாக இருப்பதாக தெரிவித்தார். தொலைக்காட்சியை திறந்தாலே தேர்தல் பிரச்சார காட்சிகள்தான் அதிகமாக இடம்பெறுகின்றன என்றும் அவர் குறிப்பிட்டார்.

மேலும், மாணவர்கள் தங்கும் விடுதிகளில் உணவு பாதுகாப்பு குறித்து கேள்வி எழுப்பிய சௌமியா அன்புமணி, இறைச்சி உணவு வழங்கப்படும்போது அதை முறையாக குளிர்சாதன வசதியில் பாதுகாத்து சமைக்க வேண்டும் என்றார். கெட்டுப்போன இறைச்சி உணவில் கலந்துவிட்டால் மாணவர்களுக்கு உடல்நல பாதிப்பு ஏற்படக்கூடும் என்பதால், உணவு பாதுகாப்பை உறுதி செய்வதில் கூடுதல் கவனம் தேவை என்றும் தெரிவித்தார்.

இறைச்சியை பாதுகாப்பாக சேமித்து, முறையாக சமைத்து வழங்குவதற்கான வசதிகள் இல்லாத இடங்களில் காய்கறி உணவு வழங்குவது பாதுகாப்பானதாக இருக்கும் என்றும் சௌமியா அன்புமணி கூறினார். உணவு வழங்கும் முறையில் மாணவர்களின் உடல்நலத்துக்கு முன்னுரிமை அளிக்க வேண்டும் என்றும் அவர் வலியுறுத்தினார்.

மேலும், ஒரு தொலைக்காட்சி செய்தியில் பாமக கொடி இடம்பெற்றது குறித்தும் அவர் கருத்து தெரிவித்தார். அந்தக் கொடியை யார் வைத்தார்கள் என்பது தனக்கு தெரியாது என்றும், அவர்கள் தாங்களாகவே கொண்டு வந்தார்களா அல்லது வேறு காரணத்திற்காக வைக்கப்பட்டதா என்பதை ஆய்வு செய்ய வேண்டும் என்றும் சௌமியா அன்புமணி தெரிவித்தார்.

தாராபுரம் இடைத்தேர்தல் பிரச்சாரத்தில் உருவகேலி குறித்த சர்ச்சை தீவிரமடைந்துள்ள நிலையில், அதே நேரத்தில் தவெக அரசு மேற்கொண்ட சில நடவடிக்கைகளை பாமக வரவேற்பதாக சௌமியா அன்புமணி தெரிவித்திருப்பது அரசியல் வட்டாரங்களில் கவனம் பெற்றுள்ளது.