2026 சட்டப்பேரவைத் தேர்தல் தோல்விக்குப் பிறகு திமுகவில் தொடங்கப்பட்டுள்ள ‘ஆபரேசன் அறிவாலயம்’ தற்போது முக்கிய கட்டத்தை எட்டியுள்ளதாக அரசியல் வட்டாரங்களில் தகவல்கள் வெளியாகியுள்ளன. தேர்தல் தோல்விக்கான காரணங்களை ஆராய அமைக்கப்பட்ட 36 பேர் கொண்ட ஆய்வுக் குழுவின் அறிக்கைகள் திமுக தலைவர் மு.க.ஸ்டாலின் கைக்கு சென்றுள்ளதாகவும், அவற்றை அடிப்படையாகக் கொண்டு கட்சியில் முக்கிய மாற்றங்கள் குறித்து ஆலோசனைகள் நடைபெற்று வருவதாகவும் கூறப்படுகிறது.

2026 சட்டப்பேரவைத் தேர்தலில் எதிர்பாராத பின்னடைவை சந்தித்த திமுக, ஆட்சியில் இருந்தபோதும் மக்களின் ஆதரவை தக்க வைத்துக் கொள்ள முடியாமல் போனது கட்சித் தலைமையை அதிர்ச்சியடையச் செய்தது. இதையடுத்து, தோல்விக்கான காரணங்களை விரிவாக ஆராய முடிவு செய்யப்பட்டது.

அதன்படி, மாவட்ட வாரியாகவும் தொகுதி வாரியாகவும் கட்சி நிர்வாகிகள், முன்னாள் அமைச்சர்கள், முன்னாள் எம்.எல்.ஏ.க்கள், மாவட்டச் செயலாளர்கள் மற்றும் அடிமட்டத் தொண்டர்களிடம் கருத்துகள் சேகரிக்கப்பட்டன. இதன் அடிப்படையில் தயாரிக்கப்பட்ட விரிவான அறிக்கைகள் சமீபத்தில் ஸ்டாலினிடம் ஒப்படைக்கப்பட்டதாக தகவல்கள் தெரிவிக்கின்றன.

இந்த அறிக்கைகள் வெறும் தேர்தல் புள்ளிவிவரங்களை மட்டும் கொண்டதாக இல்லாமல், கட்சிக்குள் நீண்டகாலமாக நிலவி வந்த அதிருப்திகள், நிர்வாகக் குறைபாடுகள், தொகுதி அளவிலான பிரச்சினைகள் மற்றும் வேட்பாளர் தேர்வில் ஏற்பட்ட சர்ச்சைகள் உள்ளிட்ட பல்வேறு அம்சங்களை பதிவு செய்துள்ளதாக கூறப்படுகிறது.

சில இடங்களில் அதிகாரப்பூர்வ வேட்பாளர்களுக்கு எதிராக உள்கட்சி வேலை நடந்ததாகவும், சில தொகுதிகளில் வேட்பாளர்கள் தனிச்செயல்பாடுகளில் ஈடுபட்டதாகவும் அறிக்கைகளில் குறிப்பிடப்பட்டுள்ளதாக தகவல்கள் வெளியாகியுள்ளன.

மேலும், ஆட்சிக் காலத்தில் அதிகார மையங்களாக கருதப்பட்ட சில அமைச்சர்கள், முன்னாள் அமைச்சர்கள், அவர்களது குடும்ப உறுப்பினர்கள், நெருங்கிய வட்டாரங்கள் மற்றும் சில அதிகாரிகளின் செயல்பாடுகள் கட்சிக்கும் அரசுக்கும் பாதிப்பை ஏற்படுத்தியதாக பல்வேறு புகார்கள் பதிவு செய்யப்பட்டிருப்பதாக கூறப்படுகிறது.

இந்த அறிக்கைகள் குறித்து ஸ்டாலின் இதுவரை எந்த பொதுக் கருத்தையும் வெளியிடவில்லை. கட்சியின் மூத்த நிர்வாகிகளுடனும் முழுமையாக பகிர்ந்து கொள்ளவில்லை என கூறப்படுகிறது.

இந்த நிலையில், ஸ்டாலின், உதயநிதி ஸ்டாலின் மற்றும் குடும்பத்தினருடன் திருவள்ளூர் மாவட்டம் அருகே உள்ள பண்ணை வீட்டிற்கு சென்றுள்ளதாகவும், அங்கு தேர்தல் ஆய்வு அறிக்கைகளை முழுமையாக ஆய்வு செய்யும் பணிகள் நடைபெற்று வருவதாகவும் தகவல்கள் தெரிவிக்கின்றன.

திமுக வட்டாரங்களில் பேசப்படும் தகவலின்படி, கட்சியின் எதிர்காலத்தை கருத்தில் கொண்டு சில கடுமையான முடிவுகள் எடுக்கப்படலாம் என்று கூறப்படுகிறது. குறிப்பாக:தேர்தல் தோல்விக்கு காரணமாக கருதப்படும் சில நிர்வாகிகள் மீது நடவடிக்கை,மாவட்ட அளவிலான பொறுப்புகளில் மாற்றம்,கட்சி அமைப்பை மறுசீரமைத்தல்,புதிய தலைமுறை நிர்வாகிகளை முன்னிலைப்படுத்துதல்,செயல்படாத நிர்வாகிகளை மாற்றுதல் போன்றவை குறித்து ஆலோசனைகள் நடைபெற்று வருவதாக கூறப்படுகிறது.

தேர்தல் முடிவுகளுக்குப் பிறகு கூட்டணி கட்சிகளின் நிலைப்பாடுகள் மற்றும் சில முக்கிய நிர்வாகிகள் குறித்து வெளியாகும் தகவல்கள் திமுக தலைமையை தீவிரமாக சிந்திக்க வைத்துள்ளதாக கூறப்படுகிறது.

இருப்பினும், இந்த அறிக்கைகளின் அடிப்படையில் உடனடியாக நடவடிக்கைகள் எடுக்கப்படுமா அல்லது படிப்படியாக மாற்றங்கள் அறிவிக்கப்படுமா என்பது இன்னும் தெளிவாகவில்லை.

ஆனால், திமுக மேற்கொண்டு வரும் இந்த உள்கட்சி ஆய்வு, கட்சியின் எதிர்கால திசையை தீர்மானிக்கும் முக்கிய கட்டமாக பார்க்கப்படுகிறது. இதனால், வரும் வாரங்களில் திமுகவில் அமைப்பு ரீதியான மாற்றங்கள், புதிய நியமனங்கள் மற்றும் சில முக்கிய நிர்வாகிகள் மீதான நடவடிக்கைகள் அறிவிக்கப்படலாம் என்ற எதிர்பார்ப்பு அரசியல் அரங்கில் பரபரப்பை ஏற்படுத்தியுள்ளது.