சென்னையின் இரண்டாவது சர்வதேச விமான நிலையமாக முன்மொழியப்பட்டுள்ள பரந்தூர் பசுமை வழி விமான நிலையத் திட்டம் தற்போது மத்திய மற்றும் மாநில அரசுகளுக்கு இடையேயான முக்கிய நிர்வாக விவகாரமாக உருவெடுத்துள்ளது. புதிய தமிழக வெற்றிக் கழக (தவெக) அரசு, இத்திட்டத்திற்கு இடைக்காலத் தடை விதித்து மாற்று இடங்களை ஆய்வு செய்ய உத்தரவிட்டுள்ள நிலையில், திட்டத்தை கைவிடக் கூடாது என மத்திய சிவில் விமானப் போக்குவரத்து அமைச்சகம் (MoCA) மற்றும் இந்திய விமான நிலைய ஆணையம் (AAI) வலியுறுத்தி வருவதாக தகவல்கள் தெரிவிக்கின்றன.

பரந்தூர் திட்டம் திடீரென உருவாக்கப்பட்ட ஒன்று அல்ல. கடந்த 7 முதல் 8 ஆண்டுகளாக வான்வெளி ஆய்வுகள், மண் பரிசோதனைகள், சுற்றுச்சூழல் தாக்க மதிப்பீடுகள் மற்றும் பாதுகாப்பு அமைச்சகம், டிஜிசிஏ (DGCA) உள்ளிட்ட பல்வேறு அமைப்புகளின் தொழில்நுட்ப ஆய்வுகளுக்குப் பிறகே இந்த இடம் இறுதி செய்யப்பட்டதாக கூறப்படுகிறது.

கடந்த 2025 ஏப்ரலில் மத்திய அரசு கொள்கை ரீதியான இறுதி அனுமதியை வழங்கியதுடன், சுமார் 1,700 ஏக்கர் நிலம் கையகப்படுத்தப்பட்டதாகவும், திட்டத்திற்கான டெண்டர் பணிகள் தொடங்கும் நிலையில் இருந்ததாகவும் தகவல்கள் தெரிவிக்கின்றன.

பரந்தூர் திட்டம் கைவிடப்பட்டால், புதிய இடத்தைத் தேர்வு செய்து மீண்டும் தொழில்நுட்ப மற்றும் சுற்றுச்சூழல் ஆய்வுகளை மேற்கொள்ள குறைந்தது 3 முதல் 4 ஆண்டுகள் வரை ஆகக்கூடும் என விமானப் போக்குவரத்து துறை நிபுணர்கள் எச்சரிக்கின்றனர்.

தற்போது சென்னை மீனம்பாக்கம் விமான நிலையம் அதன் பயணிகள் கையாளும் திறனின் உச்சத்தை நெருங்கிவிட்டதாகக் கூறப்படுகிறது. இதனால், இரண்டாவது சர்வதேச விமான நிலையம் சென்னைக்கு அவசியமான உள்கட்டமைப்புத் தேவையாக இருப்பதாக தொழில்துறையினர் வலியுறுத்துகின்றனர்.

கோவை சர்வதேச விமான நிலைய விரிவாக்கம், ஓசூர், ராமநாதபுரம், தஞ்சாவூர் மற்றும் நெய்வேலி உள்ளிட்ட பகுதிகளில் புதிய விமான நிலையத் திட்டங்களுக்கு மத்திய அரசின் அனுமதி மற்றும் நிதி ஆதரவு முக்கியமானதாக உள்ளது.

இந்த நிலையில், பரந்தூர் போன்ற பெரிய திட்டங்களில் மாநில அரசு முட்டுக்கட்டை போட்டால், பிற மாவட்டங்களின் விமான நிலையத் திட்டங்களுக்கும் அனுமதி பெறுவதில் சிக்கல்கள் ஏற்படலாம் என்ற அச்சமும் தொழில் வட்டாரங்களில் நிலவுகிறது.

சமீபத்தில் செய்தியாளர்களிடம் பேசிய தமிழக சட்டத்துறை அமைச்சர் சி.டி.ஆர். நிர்மல்குமார், "நீர்நிலைகளையும் விவசாய நிலங்களையும் பாதித்து விமான நிலையம் அமைக்க தமிழக அரசு அனுமதிக்காது. மாற்று இடங்களையே அரசு பரிசீலித்து வருகிறது" என்று தெரிவித்தார்.

பரந்தூர் மற்றும் ஏகனாபுரம் பகுதி மக்கள் நீண்டகாலமாக இந்தத் திட்டத்திற்கு எதிர்ப்பு தெரிவித்து போராட்டம் நடத்தி வரும் நிலையில், அவர்களின் வாழ்வாதாரப் பிரச்சினைகளுக்கும் அரசு முக்கியத்துவம் அளித்து வருவதாக கூறப்படுகிறது.

பெங்களூரு மற்றும் ஹைதராபாத் போன்ற நகரங்களின் வளர்ச்சியில் உலகத் தரம் வாய்ந்த சர்வதேச விமான நிலையங்கள் முக்கிய பங்காற்றியுள்ளன. அதேபோல், தமிழகம் தொடர்ந்து தொழில் மற்றும் முதலீட்டு மையமாக திகழ வேண்டுமெனில், இரண்டாவது சர்வதேச விமான நிலையம் அவசியம் என தொழில்முனைவோர் வலியுறுத்துகின்றனர்.

அதேநேரத்தில், திட்டத்தால் பாதிக்கப்படும் விவசாயிகள் மற்றும் குடியிருப்போருக்கு உயர்தர இழப்பீடு, மாற்று நிலம், வேலைவாய்ப்பு மற்றும் மறுவாழ்வு திட்டங்கள் வழங்கப்பட வேண்டும் என்பதும் முக்கிய கோரிக்கையாக உள்ளது.

பரந்தூர் விமான நிலையத் திட்டம் தற்போது உள்கட்டமைப்பு வளர்ச்சி, சுற்றுச்சூழல் பாதுகாப்பு, விவசாயிகளின் வாழ்வாதாரம் மற்றும் மத்திய-மாநில உறவுகள் ஆகிய அனைத்தையும் ஒருசேரத் தொடும் முக்கிய விவகாரமாக மாறியுள்ளது.

இந்தத் திட்டம் தொடருமா, மாற்று இடம் தேர்வு செய்யப்படுமா, அல்லது மத்திய-மாநில பேச்சுவார்த்தை மூலம் புதிய தீர்வு உருவாகுமா என்பது வரவிருக்கும் மாதங்களில் தெளிவாகும் என அரசியல் மற்றும் தொழில்துறை வட்டாரங்கள் எதிர்பார்க்கின்றன.