தமிழ்நாடு காவல்துறையின் கொடி நாள் வில்லையில் தமிழ்மொழியைப் புறக்கணித்து, இந்தி மற்றும் ஆங்கிலத்துக்கு மட்டும் இடமளித்திருப்பது கண்டனத்திற்குரியது என்று நாம் தமிழர் கட்சியின் தலைமை ஒருங்கிணைப்பாளர் சீமான் தெரிவித்துள்ளார். மேலும், “இதுதான் இந்தித் திணிப்பையும், ஒன்றிய அரசின் ஆதிக்கத்தையும் தவெக அரசு எதிர்க்கும் முறையா?” என்று கேள்வி எழுப்பியுள்ள அவர், தமிழ் இடம்பெறாத வில்லையை அணிய அறிவுறுத்தும் சுற்றறிக்கையை உடனடியாகத் திரும்பப் பெற வேண்டும் என்றும் வலியுறுத்தியுள்ளார்.

இதுதொடர்பாக சீமான் வெளியிட்டுள்ள அறிக்கையில், காவலர் வீரவணக்க நாளையொட்டி தமிழ்நாடு காவல்துறையினர் தங்களது சீருடையில் அணியும் கொடி நாள் வில்லையில் தமிழ்மொழி முற்றிலும் புறக்கணிக்கப்பட்டு, இந்தி மற்றும் ஆங்கிலம் மட்டுமே இடம்பெற்றிருப்பது வன்மையான கண்டனத்திற்கு உரியது என்று தெரிவித்துள்ளார்.

தமிழ்நாட்டின் ஆட்சிமொழியான தமிழுக்கே தமிழ்நாடு காவல்துறையில் இடமில்லாத நிலையை தவெக அரசு ஏற்படுத்தியிருப்பது வெட்கக்கேடானது என்றும் அவர் விமர்சித்துள்ளார்.

கடந்த 29.09.2026 அன்று ஒன்றிய உள்துறை அமைச்சகம் அனுப்பிய கடிதத்தைத் தொடர்ந்து, 04.10.2026 அன்று தமிழ்நாடு காவல்துறைத் தலைவர் சுற்றறிக்கை வெளியிட்டு, இந்தி மற்றும் ஆங்கிலம் மட்டுமே இடம்பெற்றுள்ள வில்லையை அணிய அறிவுறுத்தியிருப்பது அதிர்ச்சியளிப்பதாக சீமான் குறிப்பிட்டுள்ளார். தமிழைத் தவிர்த்துவிட்டு இந்தியை மட்டும் இடம்பெறச் செய்ய வேண்டும் என்ற ஒன்றிய அரசின் முடிவைத் தமிழகத்தை ஆளும் தவெக அரசு எவ்வித எதிர்ப்புமின்றி ஏற்றுக்கொண்டது ஏன் என்றும் அவர் கேள்வி எழுப்பியுள்ளார்.

“இதுதான் இந்தித் திணிப்பையும், ஒன்றிய அரசின் ஆதிக்கத்தையும் தவெக அரசு எதிர்க்கும் முறையா? இந்தியும் ஆங்கிலமும்தான் தவெக ஆட்சியின் இருமொழிக் கொள்கையா? தமிழ்நாட்டுக் காவல்துறையினர் அணியும் ஒரு சிறிய வில்லையில்கூடத் தமிழுக்கு இடமளிக்க முடியாது என்றால், தவெக அரசுக்குத் தமிழ் உணர்வு என்ற ஒன்று அணுவளவாவது இருக்கிறதா?” என்று சீமான் தனது அறிக்கையில் கேள்வி எழுப்பியுள்ளார்.

தமிழ்மொழியைப் பாதுகாப்பதற்காகப் பல தலைமுறைகளாக முன்னோர்கள் போராடி உயிர்த் தியாகம் செய்திருப்பதைச் சுட்டிக்காட்டியுள்ள அவர், மொழிப்போர் தியாகிகளின் தியாகத்தால் காக்கப்பட்ட தமிழ்மொழியை, ஒன்றிய அரசின் ஒரு கடிதத்திற்காகப் புறக்கணிப்பது அவர்களின் தியாகத்திற்குச் செய்யும் பெரும் துரோகம் என்றும் தெரிவித்துள்ளார்.

தமிழ்நாட்டில் தமிழுக்கு இடமளிப்பதற்குக்கூட ஒன்றிய அரசிடம் அனுமதி பெற வேண்டுமா என்றும், தமிழர்களின் வரிப்பணத்தில் இயங்கும் தமிழ்நாடு காவல்துறையின் சீருடையில் தமிழ் இடம்பெறுவதைத் தடுப்பதற்கு ஒன்றிய அரசுக்கு என்ன உரிமை இருக்கிறது என்றும் அவர் கேள்வி எழுப்பியுள்ளார்.

தமிழ்நாடு காவல்துறை மாநில அரசின் அதிகாரத்திற்கு உட்பட்டது என்றும், முதலமைச்சரின் நேரடிக் கட்டுப்பாட்டில் இயங்கும் முதன்மையான துறையில் தமிழ்மொழியின் உரிமையை நிலைநாட்ட முடியாமல் ஒன்றிய உள்துறை அமைச்சகத்தின் உத்தரவுக்கு முதலமைச்சர் விஜய் அடிபணிந்திருப்பது தமிழகத்திற்கு ஏற்பட்ட தலைகுனிவும் அவமானமும் என்றும் சீமான் விமர்சித்துள்ளார். மேலும், கொடி நாள் வில்லையில் தமிழ்மொழியைப் புறக்கணித்திருப்பதற்காகத் தவெக அரசு தமிழக மக்களிடம் உடனடியாக மன்னிப்புக் கேட்க வேண்டும் என்றும் வலியுறுத்தியுள்ளார்.

இறுதியாக, இருமொழிக் கொள்கையின்படி, கடந்த திமுக ஆட்சிவரை பின்பற்றப்பட்ட நடைமுறையைத் தொடர்ந்து, தமிழ்நாடு காவல்துறையின் கொடி நாள் வில்லையில் தமிழ் மற்றும் ஆங்கிலம் மட்டுமே இடம்பெற வேண்டும் என்று சீமான் கோரிக்கை விடுத்துள்ளார். தமிழ்மொழி இடம்பெறாத வில்லையை அணிய அறிவுறுத்தும் சுற்றறிக்கையை உடனடியாகத் திரும்பப் பெற்று, தமிழுக்கு முதன்மை அளிக்கும் வகையில் புதிய வில்லையை வழங்க வேண்டும் என்றும் தமிழ்நாடு அரசை அவர் வலியுறுத்தியுள்ளார்.