தமிழக சட்டசபையின் தற்போதைய பதவிக்காலம் விரைவில் முடிவை நெருங்கி வரும் நிலையில், 2026 மே மாதத்துக்குள் அடுத்த சட்டசபைத் தேர்தலை நடத்தி முடிக்க வேண்டிய கட்டாயம் ஏற்பட்டுள்ளது. இதனை முன்னிட்டு தேர்தல் ஆணையம் தேர்தலுக்கான ஆரம்ப கட்ட ஆயத்தப் பணிகளை ஏற்கனவே தொடங்கி விட்டது.

இந்நிலையில், அரசியல் களமும் சூடுபிடிக்கத் தொடங்கியுள்ளது. முக்கிய அரசியல் கட்சிகள் அனைத்தும் தேர்தல் போர்க்களத்திற்குத் தயாராகி, முழு வேகத்தில் பணிகளை முன்னெடுத்து வருகின்றன. தற்போதைய அரசியல் சூழலைப் பார்க்கும்போது, தி.மு.க., அ.தி.மு.க., த.வெ.க. ஆகிய மூன்று அணிகளும், நாம் தமிழர் கட்சி தனித்த அணியாகவும் களமிறங்கும் வகையில், நான்கு முனைப் போட்டி உருவாகும் என அரசியல் வட்டாரங்களில் பரவலாக பேசப்படுகிறது.

இதில், தமிழக வெற்றிக் கழகம் (த.வெ.க.) தேர்தல் பணிகளை ஏற்கனவே வேகப்படுத்தி வருகிறது.இந்தச் சூழலில், சென்னை பட்டினம்பாக்கத்தில் உள்ள நடிகர் விஜயின் இல்லத்தில் நேற்று முக்கிய ஆலோசனைக் கூட்டம் நடைபெற்றது. இந்தக் கூட்டத்தில் த.வெ.க. நிர்வாகக் குழு தலைமை ஒருங்கிணைப்பாளர் செங்கோட்டையன், தேர்தல் பிரிவு மேலாண்மை செயலாளர் ஆதவ் அர்ஜுனா உள்ளிட்ட முக்கிய நிர்வாகிகள் கலந்து கொண்டனர்.

ஆனால், கட்சியின் பொதுச் செயலாளர் புஸ்ஸி ஆனந்த் இந்தக் கூட்டத்தில் பங்கேற்கவில்லை. அவர், பனையூரில் உள்ள கட்சி அலுவலகத்தில் இருந்து தினசரி கட்சி பணிகளை கவனித்து வந்ததாக தகவல்கள் தெரிவிக்கின்றன.

சுமார் மூன்று மணி நேரம் நீடித்த இந்த ஆலோசனைக் கூட்டத்தில், கூட்டணி பேச்சுவார்த்தைகளை முன்னெடுக்க தனித்த குழு அமைப்பது குறித்தும், அந்தக் குழுவில் இடம்பெற வேண்டிய உறுப்பினர்கள் யார் என்பது குறித்தும், விஜய் மூத்த நிர்வாகிகளுடன் விரிவாக ஆலோசனை நடத்தியதாக கூறப்படுகிறது.

அதேபோல், தேர்தல் அறிக்கை தயாரிப்பதற்கான குழுவை அமைப்பது குறித்தும் இந்தக் கூட்டத்தில் தீவிரமாக விவாதிக்கப்பட்டது.மேலும், கூட்டணி பேச்சுவார்த்தை குழுவின் உறுப்பினர்கள் குறித்த அதிகாரப்பூர்வ அறிவிப்பு விரைவில் வெளியாகும் என தகவல்கள் தெரிவிக்கின்றன.

மக்களின் அடிப்படை தேவைகள், மாநிலத்தின் முக்கிய பிரச்சினைகள், இளைஞர்கள், பெண்கள், விவசாயிகள், தொழிலாளர்கள் உள்ளிட்ட அனைத்துத் தரப்பினரின் எதிர்பார்ப்புகளையும் பிரதிபலிக்கும் வகையில், வலுவான மற்றும் மக்கள் மையமான தேர்தல் அறிக்கையை உருவாக்குவதில் விஜய் தனிப்பட்ட கவனம் செலுத்தி வருவதாக அரசியல் வட்டாரங்கள் தெரிவிக்கின்றன.