சென்னை: நாம் தமிழர் கட்சி ஒருங்கிணைப்பாளர் சீமான், சென்னை பல்லாவரத்தில் நடைபெற்ற நிகழ்ச்சியில் பேசியபோது, தமிழக வெற்றிக் கழகத்தை (தவெக) மற்றும் அதன் அரசியல் அணுகுமுறையை கடுமையாக விமர்சித்தார்.

தமிழ் மொழி மற்றும் தமிழர் அடையாளத்தின் முக்கியத்துவத்தை வலியுறுத்திய அவர், "ஒரு மனிதன் தன்னை தமிழன் என்றும், தனது தாய்மொழி தமிழ் என்றும் பெருமையுடன் கூறும் நாளில்தான் இந்த இனம் உண்மையான எழுச்சியை அடையும். அனைத்து மொழிகளையும் வாழ்க்கைக்காக கற்கலாம். ஆனால், நம் இனத்தின் அடையாளமான தமிழை காப்பது ஒவ்வொரு தமிழரின் கடமை" என்றார்.

தொடர்ந்து பேசிய சீமான், "தமிழ் என்று உச்சரிக்காதவரிடமும், தமிழன் என்று அழைக்காதவரிடமும் நாட்டை ஒப்படைத்துவிட்டு எங்களை நடுத்தெருவில் நிறுத்திவிட்டீர்கள். நடிகருக்கும் தலைவருக்கும் உள்ள வித்தியாசம் தெரியாமல் செயல்படுகிறார்கள்" என்று மறைமுகமாக தவெக தலைமையை விமர்சித்தார்.

மேலும், தங்கள் கட்சியை "திரள்நிதி" என விமர்சித்தவர்களை சாடிய அவர், "இவ்வளவு நாள் எங்களை குற்றம்சாட்டியவர்கள், இன்று தாங்களே பல்வேறு குற்றச்சாட்டுகளை எதிர்கொள்கிறார்கள். எங்களை விமர்சிப்பதற்கு முன்பு தங்களைப் பற்றி சிந்திக்க வேண்டும்" என்று கூறினார்.

இடைத்தேர்தலை குறிப்பிட்ட அவர், "அதற்காக நான் ஆவலுடன் காத்திருக்கிறேன். இன்னும் முழுமையாக களத்தில் இறங்கவில்லை. களத்தில் இறங்கினால் அரசியல் நிலைமையே மாறும்" என்று தெரிவித்தார்.

சீமானின் இந்தப் பேச்சு தமிழக அரசியல் வட்டாரத்தில் கவனத்தை ஈர்த்துள்ளது.