தமிழகத்தில் நடைபெற உள்ள உள்ளாட்சித் தேர்தலில் தனித்துப் போட்டியிடப் போவதாக ‘வீ தி லீடர்ஸ்’ அமைப்பின் தலைவர் அண்ணாமலை தெரிவித்துள்ளார். தாங்கள் அரசியலுக்கு வருவது உறுதி என்றும், தற்போது அரசியல் கட்சியின் பெயரை வெளியிட வேண்டிய அவசியம் இல்லை என்றும் அவர் கூறியுள்ளார். உள்ளாட்சித் தேர்தலை அடிப்படையாகக் கொண்டு புதிய அரசியல் கட்டமைப்பை உருவாக்க அண்ணாமலை திட்டமிட்டுள்ளதாக வெளியாகியுள்ள தகவல் தமிழக அரசியல் வட்டாரத்தில் கவனத்தைப் பெற்றுள்ளது.

பாஜகவில் இருந்து விலகிய அண்ணாமலை, தற்போது ‘வீ தி லீடர்ஸ்’ என்ற அமைப்பை நடத்தி வருகிறார். இந்த அமைப்பை விரைவில் அரசியல் கட்சியாக மாற்றுவதற்கான நடவடிக்கைகளில் அவர் ஈடுபட்டு வருவதாகக் கூறப்படுகிறது. அமைப்பின் கட்டமைப்பை வலுப்படுத்துவது, புதிய நிர்வாகிகளை உருவாக்குவது, உறுப்பினர் சேர்க்கையை அதிகரிப்பது உள்ளிட்ட பணிகளில் அவர் கவனம் செலுத்தி வருகிறார். இந்த அமைப்பில் இதுவரை 25 லட்சம் பேர் உறுப்பினர்களாக இணைந்துள்ளதாக அண்ணாமலை தரப்பில் தெரிவிக்கப்பட்டுள்ளது.

இதற்கிடையே, வரவிருக்கும் உள்ளாட்சித் தேர்தலில் ‘வீ தி லீடர்ஸ்’ அமைப்பைச் சேர்ந்தவர்கள் போட்டியிடுவார்கள் என்று அண்ணாமலை ஏற்கெனவே தெரிவித்திருந்தார். இந்த நிலையில், கோவையில் செய்தியாளர்களைச் சந்தித்த அவர், உள்ளாட்சித் தேர்தலுக்காகத் தனித்தனியாக விரிவான திட்டங்கள் தயாரிக்கப்பட்டு வருவதாகக் கூறினார். மேலும், உள்ளாட்சித் தேர்தல் பிரசாரம் தேசிய அளவிலான பிரசாரமாக இருக்கும் என்றும் அவர் குறிப்பிட்டார்.

அரசியலுக்கு வந்ததன் நோக்கம் அடிப்படை மாற்றங்களை உருவாக்குவதும், புதிய தலைவர்களை உருவாக்குவதும்தான் என்று தெரிவித்த அண்ணாமலை, உள்ளாட்சித் தேர்தலில் தனித்துப் போட்டியிடுவதே சிறந்த முடிவாக இருக்கும் என்றார். அவ்வாறு போட்டியிட்டால்தான் தங்களின் சிந்தனைகள், கொள்கைகள் மற்றும் திட்டங்களை மக்களிடம் நேரடியாகக் கொண்டு செல்ல முடியும் என்றும் அவர் விளக்கினார்.

தொடர்ந்து பேசிய அண்ணாமலை, “நாங்கள் அரசியல் கட்சி தொடங்குவது உறுதி. உள்ளாட்சித் தேர்தலில் போட்டியிட்டு அடிப்படை மாற்றங்களைக் கொண்டு வருவதில் தெளிவாக இருக்கிறோம். அரசியல் கட்சியின் பெயரில் மட்டுமே போட்டியிட வேண்டும் என்ற அவசியம் இல்லை. தற்போது அரசியல் கட்சியின் பெயரை வெளியிடப் போவதில்லை. உள்ளாட்சித் தேர்தலில் ஓர் இயக்கமாகக்கூடப் போட்டியிடலாம்” என்று தெரிவித்துள்ளார்.

அண்ணாமலையின் இந்தக் கருத்துகள், ‘வீ தி லீடர்ஸ்’ அமைப்பு முதலில் உள்ளாட்சித் தேர்தலில் களமிறங்கி தனது செல்வாக்கை மதிப்பிடத் திட்டமிட்டுள்ளதா என்ற கேள்வியை எழுப்பியுள்ளன. நடிகர் விஜய் அரசியலில் நுழைவதற்கு முன்பு அவரது மக்கள் இயக்கம் உள்ளாட்சித் தேர்தலில் போட்டியிட்டு தனது பலத்தை வெளிப்படுத்தியது. அந்தத் தேர்தலில் வெற்றி பெற்ற நிர்வாகிகள் பின்னர் விஜய்யுடன் புகைப்படம் எடுத்துக்கொண்டதும் அரசியல் வட்டாரத்தில் கவனம் பெற்றது.

அதேபோன்ற அணுகுமுறையை அண்ணாமலையும் பின்பற்றத் திட்டமிட்டுள்ளாரா என்ற விவாதம் தற்போது எழுந்துள்ளது. உள்ளாட்சித் தேர்தலில் வேட்பாளர்களைக் களமிறக்கி, வெற்றி வாய்ப்புகளை மதிப்பிட்டு, அதன் அடிப்படையில் அமைப்பின் அரசியல் கட்டமைப்பை விரிவுபடுத்த அவர் முயற்சி செய்யக்கூடும் என்று அரசியல் வட்டாரத்தில் பேசப்படுகிறது. எனினும், கட்சியின் பெயர், தொடக்கத் தேதி, வேட்பாளர்கள் குறித்த விவரங்கள் எதுவும் இதுவரை அதிகாரப்பூர்வமாக அறிவிக்கப்படவில்லை.

உள்ளாட்சித் தேர்தலில் தனித்துப் போட்டியிடும் முடிவை அண்ணாமலை உறுதிப்படுத்தியுள்ள நிலையில், அவரது அமைப்பு எத்தகைய அரசியல் தாக்கத்தை ஏற்படுத்தும் என்பதும், புதிய அரசியல் கட்சி உருவாகும்போது தமிழகத்தின் அரசியல் களம் எந்த அளவுக்கு மாறும் என்பதும் எதிர்பார்ப்பை ஏற்படுத்தியுள்ளது.