ஈரோடு கிழக்கு சட்டமன்ற உறுப்பினராக இருந்த ஈ.வி.கே.எஸ் இளங்கோவனின் மகன் திருமகன் ஈவேரா கடந்த டிசம்பர் 4ம் தேதி உடல் நலக்குறைவால் காலமானதை அடுத்து ஈரோடு கிழக்கு தொகுதி காலியானதாக அறிவிக்கப்பட்டது.

இதனை அடுத்து இன்று (பிப்ரவரி 27ஆம் தேதி) ஈரோடு கிழக்கு தொகுதி இடைத்தேர்தல் நடைபெறும் என இந்திய தேர்தல் ஆணையம் அறிவித்தது.

இதனிடையே வேட்புமனு மற்றும் வேட்பு மனுக்கள் மீதான பரிசீலனை நிறைவடைந்து இறுதியாக ஈரோடு கிழக்கு இடைத்தேர்தலில் 75 வேட்பாளர்கள் போட்டியிடுகின்றனர்.  இதனையடுத்து ஈரோடு கிழக்கு இடைத்தேர்தலையொட்டி சுமார் 20 நாட்களுக்கும் மேலாக நடைபெற்ற பிரச்சாரம் நேற்று முன்தினம் நிறைவடைந்தது.

இந்த இடைத்தேர்தலுக்காக 52 இடங்களில் 238 வாக்குச்சாவடி மையங்கள் அமைக்கப்பட்டுள்ளன. அதன்படி காலை 7:00 மணி முதல் மாலை 6 மணி வரை வாக்குப்பதிவு நடைபெற உள்ளது. காலை 7 மணிக்கு தொடங்கிய வாக்குப்பதிவில் பொதுமக்கள் வரிசையில் நின்று ஆர்வமாக வாக்களித்து வருகின்றனர்.

இந்த நிலையில் அதிமுக வேட்பாளர் தென்னரசு கல்லூ பிள்ளையார் கோவில் தெருவில் உள்ள அரசு பள்ளியில் வாக்களித்து தனது ஜனநாயக கடமையை நிறைவேற்றினார்.

அதை பின்னர் செய்திகளை சந்தித்து பேசிய அவர், தேர்தலுக்கான ஏற்பாடுகள் சிறப்பாக செய்யப்பட்டுள்ளது. பொதுமக்கள் விறுவிறுப்பாக வாக்குகளை செலுத்தி வருகின்றனர். எந்த பிரச்சனையும் இல்லாமல் அமைதியான முறையில் வாக்கு நடைபெறுகிறது என்று அவர் தெரிவித்துள்ளார்.

மேலும், வாக்குப்பதிவுக்கு விரல்களில் வைக்கப்படும் மை விரைவில் அழிவதாக தரமற்ற மை குறித்து தேர்தல் அதிகாரிகளிடம் புகார் அளித்துள்ளதாக தெரிவித்துள்ளார். மேலும் இந்த தேர்தலில் 25 ஆயிரம் வாக்குகள் வித்தியாசத்தில் வெற்றி பெறுவேன் என அவர் நம்பிக்கை தெரிவித்துள்ளார்.