தமிழக அரசியலில் சினிமா நட்சத்திரங்களின் வரவும், அவர்களைச் சுற்றி உருவாகும் ரசிகர் படையும் புதிதல்ல. ஆனால், சமீபகாலமாக தேர்தல் வெற்றி, மக்கள் செல்வாக்கு ஆகியவற்றை தீர்மானிக்கும் முக்கிய சக்தியாக சமூக வலைதளங்கள் உருவெடுத்துள்ளன. குறிப்பாக தமிழக வெற்றிக் கழகத் தலைவர் விஜய்யின் அரசியல் எழுச்சிக்குப் பிறகு, டிஜிட்டல் அரசியல் தமிழகத்தில் புதிய பரிமாணத்தை எட்டியுள்ளது.

விஜய்யின் அரசியல் பயணத்தில் அவரது கட்சியின் தகவல் தொழில்நுட்ப அணியும், ஆதரவாளர்களும் சமூக வலைதளங்களை தீவிரமாக பயன்படுத்தியதாக கூறப்படுகிறது. இன்ஸ்டாகிராம், எக்ஸ் உள்ளிட்ட தளங்களில் ஹேஷ்டேக் பிரச்சாரங்கள், மீம்கள், ரீல்ஸ்கள், வீடியோ டிரெண்ட்கள் என பல்வேறு வழிகளில் இளைஞர்கள் மற்றும் முதன்முறை வாக்காளர்களை கவரும் முயற்சிகள் முன்னெடுக்கப்பட்டன. பாரம்பரிய அரசியல் பிரச்சாரங்களுக்கு மாறாக, டிஜிட்டல் தளங்கள் மூலம் உருவாக்கப்பட்ட கருத்து வாக்கு அரசியலிலும் தாக்கத்தை ஏற்படுத்தியதாக அரசியல் விமர்சகர்கள் கருதுகின்றனர்.

இந்த சூழலில்தான் நடிகர் தனுஷ் அரசியலுக்கு வரப்போகிறார் என்ற தகவல்கள் இணையத்தில் பரபரப்பை ஏற்படுத்தி வருகின்றன. தனுஷ் தனது நற்பணி மன்றத்தை தொகுதி வாரியாக கட்டமைத்து வருவதாகவும், உறுப்பினர் சேர்க்கையை தீவிரப்படுத்தி வருவதாகவும் செய்திகள் வெளியாகியுள்ளன. குறிப்பாக கோவை மாவட்டத்தில் சட்டமன்றத் தொகுதி வாரியாக நற்பணி இயக்கத்தை விரிவுபடுத்தும் நடவடிக்கைகள் கவனம் பெற்றுள்ளன.

மேலும், தனது பிறந்தநாளை முன்னிட்டு தனுஷ் நடத்திய நலத்திட்ட உதவிகள் மற்றும் ரசிகர்களிடம் அவர் பேசிய கருத்துகளும் அரசியல் நோக்கத்துடன் பார்க்கப்படுகின்றன. மக்கள் நலப் பணிகளில் ரசிகர்கள் ஈடுபட வேண்டும் என அவர் வலியுறுத்தியிருப்பது, தனுஷின் அரசியல் வருகை குறித்த எதிர்பார்ப்பை மேலும் அதிகரித்துள்ளது.

இதற்கிடையே தனுஷின் அரசியல் வருகை குறித்த பேச்சு, விஜய் ஆதரவு சமூக வலைதள வட்டாரங்களிலும் விவாதத்தை ஏற்படுத்தியுள்ளதாக கூறப்படுகிறது. தனுஷ் அரசியலுக்கு வந்தால், சினிமா ரசிகர்கள் மற்றும் இளைஞர்கள் மத்தியில் விஜய்க்கு இருக்கும் ஆதரவில் ஒரு பகுதியை அவர் ஈர்க்கக்கூடும் என்ற கருத்தும் நிலவி வருகிறது.

இதனால், தனுஷை மையமாக வைத்து பல்வேறு மீம்கள், விமர்சனங்கள் மற்றும் விவாதங்கள் சமூக வலைதளங்களில் அதிகரித்து வருவதாக கூறப்படுகிறது. குறிப்பாக தனுஷின் திரைப்படங்கள், சமீபத்திய செயல்பாடுகள் மற்றும் அவரது அரசியல் தொடர்பான கருத்துகள் ஆகியவற்றை முன்வைத்து விஜய் ஆதரவு சமூக வலைதள கணக்குகள் விமர்சனங்களை பதிவிட்டு வருவதாக தகவல்கள் வெளியாகியுள்ளன.

ஒரு நடிகர் தனது ரசிகர் மன்றத்தை அரசியல் கட்டமைப்பாக மாற்ற முயற்சிப்பதும், அதற்கு எதிராக மற்றொரு அரசியல் சக்தியின் ஆதரவாளர்கள் டிஜிட்டல் களத்தில் எதிர்வினையாற்றுவதும் தமிழக அரசியலில் புதிய சூழலை உருவாக்கியுள்ளது. போஸ்டர், சுவரொட்டி, தெருமுனைப் பிரச்சாரம் ஆகியவற்றைத் தாண்டி, தற்போது ஒரு அரசியல் தலைவரின் பிம்பத்தை உருவாக்குவதிலும், எதிராளியின் செல்வாக்கை கட்டுப்படுத்துவதிலும் சமூக வலைதளங்கள் முக்கிய பங்கு வகிக்கும் நிலை உருவாகியுள்ளது.

எனினும், தனுஷ் இதுவரை அரசியல் கட்சி தொடங்குவது குறித்து எந்த அதிகாரப்பூர்வ அறிவிப்பையும் வெளியிடவில்லை. அவரது நற்பணி இயக்க நடவடிக்கைகள் அரசியல் கட்சி தொடங்குவதற்கான முன்னேற்பாடுகளா அல்லது ரசிகர் மன்றத்தை வலுப்படுத்தும் முயற்சியா என்பது தெளிவாகவில்லை.

ஆனால், தனுஷின் அரசியல் வருகை குறித்த பேச்சு உருவாகியுள்ள நிலையிலேயே சமூக வலைதளங்களில் எதிரெதிர் பிரச்சாரங்கள் தொடங்கியிருப்பது, தமிழகத்தின் அடுத்தகட்ட அரசியல் போட்டி தெருக்களில் மட்டுமல்ல... ஸ்மார்ட்போன் திரைகளிலும் தீவிரமாக நடைபெறப் போகிறது என்பதற்கான அறிகுறியாக பார்க்கப்படுகிறது.