நடிகராக இருந்து அரசியலுக்குள் நுழைந்த தமிழக வெற்றிக் கழகத் தலைவர் விஜய், தமிழக முதல்வராக பதவியேற்று நாளையுடன் 100 நாட்களை நிறைவு செய்கிறார். மிகப்பெரிய அரசியல் எதிர்பார்ப்புகளுக்கு மத்தியில் ஆட்சிப் பொறுப்பை ஏற்ற விஜய்க்கு, பதவியேற்ற நாள் முதல் பல்வேறு சவால்களும் சர்ச்சைகளும் தொடர்ந்து வந்துகொண்டிருக்கின்றன. இந்த நிலையில், விஜய் அரசின் முதல் 100 நாட்கள் சாதனையா, வேதனையா என்ற விவாதம் தமிழக அரசியல் களத்தில் தீவிரமடைந்துள்ளது.

தமிழக அரசியலில் நீண்ட காலமாக திமுகவும் அதிமுகவும் மாறி மாறி ஆட்சிப் பொறுப்பில் இருந்து வந்த நிலையில், தமிழக வெற்றிக் கழகம் அந்த அரசியல் களத்தில் மூன்றாவது முக்கிய சக்தியாக உருவெடுத்தது. கட்சி தொடங்கிய குறுகிய காலத்திலேயே ஆட்சியை கைப்பற்றிய விஜய், தமிழக அரசியலில் மிகப்பெரிய மாற்றத்தை ஏற்படுத்தியதாக அவரது ஆதரவாளர்கள் கூறுகின்றனர்.

தேர்தல் வெற்றிக்குப் பிறகு மே 10ஆம் தேதி காலை தமிழக முதல்வராக விஜய் பதவியேற்றார். அப்போது ஊழல் மற்றும் லஞ்சத்திற்கு எதிராக கடுமையான எச்சரிக்கையை விடுத்த அவர், அரசு நிர்வாகத்தில் பணம் சம்பாதிக்கும் நோக்கத்துடன் செயல்படுபவர்கள் வெளியேற வேண்டும் என்று கூறினார். அதே நிகழ்ச்சியில் 200 யூனிட் இலவச மின்சாரம், பெண்களுக்கான சிறப்பு அதிரடிப்படை, போதைப்பொருள் தடுப்புக்கான சிறப்புப் படை உள்ளிட்ட பல்வேறு அறிவிப்புகளையும் வெளியிட்டார்.

அதன்பிறகு கல்வி நிறுவனங்கள் மற்றும் வழிபாட்டுத் தலங்களுக்கு அருகில் செயல்பட்டு வந்த 717 டாஸ்மாக் கடைகள் மூடப்பட்டதாக அரசு தரப்பில் தெரிவிக்கப்பட்டது. அரசு ஊழியர்களுக்கான அகவிலைப்படி உயர்த்தப்பட்டதும் கவனம் பெற்றது. அதேபோல், அம்மா உணவகங்களை அரசின் கட்டுப்பாட்டில் கொண்டு வந்து அவற்றை மறுசீரமைத்து தரமான உணவு வழங்க நடவடிக்கை எடுக்கப்பட்டதாகவும் தெரிவிக்கப்பட்டது.

விவசாயிகளின் பயிர்க்கடன் தள்ளுபடி, குறிப்பாக சிறு மற்றும் குறு விவசாயிகளுக்கான கடன் தள்ளுபடி உள்ளிட்ட அறிவிப்புகளும் விஜய் அரசின் முதல் 100 நாட்களில் முக்கியத்துவம் பெற்றன.

மாநில நலன் சார்ந்த விவகாரங்களிலும் விஜய் மத்திய அரசுடன் பேச்சுவார்த்தை நடத்தினார். டெல்லி சென்ற விஜய், பிரதமர் நரேந்திர மோடியை சந்தித்து மேகதாது அணை விவகாரம், தமிழக மீனவர்கள் பிரச்சினை உள்ளிட்ட பல்வேறு கோரிக்கைகளை முன்வைத்ததாக அரசு தரப்பில் தெரிவிக்கப்பட்டது.

பெண்கள் மற்றும் குழந்தைகள் தொடர்பான திட்டங்களும் இந்த காலகட்டத்தில் அறிவிக்கப்பட்டன. அரசு மருத்துவமனைகளில் பிறக்கும் குழந்தைகளுக்கு தாய்மாமன் தங்க மோதிரம் வழங்கும் திட்டம், திருமணமாகும் பெண்களுக்கு அண்ணன் சீர் திட்டத்தின் கீழ் தங்க நாணயம் மற்றும் பட்டுப்புடவை வழங்கும் திட்டம் உள்ளிட்ட அறிவிப்புகள் பட்ஜெட்டில் இடம்பெற்றன.

இதுதவிர குடிசை வீடுகளுக்கு மாற்றாக 70 ஆயிரம் கான்கிரீட் வீடுகள், பிளஸ் 1 மாணவர்களுக்கு நவீன சைக்கிள்கள், அரசு கல்லூரி மாணவர்களுக்கு மடிக்கணினிகள் உள்ளிட்ட பல்வேறு திட்டங்களும் அறிவிக்கப்பட்டுள்ளன.

தொழில் முதலீடுகளை ஈர்ப்பதிலும் அரசு கவனம் செலுத்தியதாக தொழில்துறை தரப்பில் கூறப்படுகிறது. 100 நாட்களில் 104 புரிந்துணர்வு ஒப்பந்தங்கள் மூலம் ரூ.1.02 லட்சம் கோடிக்கும் அதிகமான முதலீடுகள் ஈர்க்கப்பட்டுள்ளதாகவும், இதன் மூலம் 1.21 லட்சத்துக்கும் மேற்பட்ட வேலைவாய்ப்புகள் உருவாகும் என்றும் அரசு தரப்பில் தெரிவிக்கப்பட்டுள்ளது. சமீபத்தில் நடைபெற்ற முதலீட்டாளர்கள் மாநாட்டில் மட்டும் 97 புரிந்துணர்வு ஒப்பந்தங்கள் கையெழுத்தாகி ரூ.67,452 கோடி முதலீடுகள் ஈர்க்கப்பட்டதாகவும் அரசு தெரிவித்துள்ளது.

ஆனால், மறுபுறம் விஜய் அரசுக்கு எதிரான விமர்சனங்களும் குறையவில்லை. லஞ்சம் மற்றும் ஊழலற்ற நிர்வாகம் என்று முதல்வர் அறிவித்திருந்தாலும், பல்வேறு இடங்களில் அதிகாரிகள் மற்றும் அரசியல் பிரமுகர்கள் லஞ்ச வழக்குகளில் சிக்குவதாக எதிர்க்கட்சிகள் குற்றம்சாட்டி வருகின்றன.

சட்டம்-ஒழுங்கு பிரச்சினைகள், பெண்கள் மற்றும் குழந்தைகளுக்கு எதிரான குற்றங்கள், மின்தடை உள்ளிட்ட விவகாரங்களும் அரசுக்கு சவாலாக மாறியுள்ளன. நிர்வாகத்தில் அனுபவம் குறைவாக இருப்பதால் சில நேரங்களில் அரசு தடுமாறுவதாகவும் விமர்சனங்கள் எழுகின்றன.

இதற்கெல்லாம் மேலாக அமைச்சர்கள் மற்றும் ஆளுங்கட்சியின் முக்கிய நிர்வாகிகள் தொடர்ச்சியாக சர்ச்சைகளில் சிக்குவது விஜய்க்கு மிகப்பெரிய தலைவலியாக மாறியுள்ளது. அமைச்சர்களின் பேச்சுகள், உடல் மொழி, எதிர்க்கட்சிகளுக்கு அளிக்கும் பதில்கள் உள்ளிட்டவை அவ்வப்போது அரசியல் விவாதத்தை ஏற்படுத்துகின்றன.

குறிப்பாக சட்டப்பேரவையில் திமுகவும் அதிமுகவும் எதிர்க்கட்சிகளாக இருப்பது விஜய் அரசுக்கு மிகப்பெரிய சவாலாக பார்க்கப்படுகிறது. கடந்த பல ஆண்டுகளாக ஆட்சி மற்றும் எதிர்க்கட்சி அனுபவம் கொண்ட இந்த இரு கட்சிகளின் மூத்த உறுப்பினர்கள் முன்வைக்கும் கேள்விகளுக்கு ஆளுங்கட்சி உறுப்பினர்கள் சில நேரங்களில் தடுமாறுவதாகவும் விமர்சனங்கள் எழுகின்றன.

விஜய் ஆட்சிக்கு எதிராக எழும் ஒவ்வொரு விமர்சனத்தையும் திறம்பட எதிர்கொள்வது முதல்வரின் பொறுப்பு என்ற நிலையில், அவரைச் சுற்றியுள்ள அமைச்சர்கள் மற்றும் நிர்வாகிகளின் செயல்பாடுகளும் முக்கியத்துவம் பெறுகின்றன. ஒரு சிலரின் சர்ச்சைக்குரிய பேச்சுகள் ஒட்டுமொத்த அரசுக்கும் எதிர்மறையான பிம்பத்தை உருவாக்கும் அபாயம் இருப்பதாக அரசியல் பார்வையாளர்கள் எச்சரிக்கின்றனர்.

அதேநேரத்தில், எந்த ஒரு அரசையும் வெறும் 100 நாட்களை வைத்து முழுமையாக மதிப்பிட முடியாது என்பதும் உண்மை. ஆட்சியின் நிர்வாகத் திறன், தேர்தல் வாக்குறுதிகளின் செயல்படுத்தல், சட்டம்-ஒழுங்கு, பொருளாதாரம், வேலைவாய்ப்பு உள்ளிட்டவற்றின் நீண்டகால செயல்பாடுகளே இறுதியில் விஜய் அரசின் வெற்றியை தீர்மானிக்கும்.

எனவே, விஜய் அரசின் முதல் 100 நாட்களைப் பொறுத்தவரை, ஒருபுறம் பல்வேறு புதிய திட்டங்கள் மற்றும் முதலீட்டு அறிவிப்புகள் சாதனைகளாக முன்வைக்கப்பட்டாலும், மறுபுறம் நிர்வாகக் குறைபாடுகள், சட்டம்-ஒழுங்கு பிரச்சினைகள் மற்றும் அமைச்சர்களின் சர்ச்சைகள் வேதனையாக அமைந்துள்ளன. ‘ஒரு பானை சோற்றுக்கு ஒரு சோறு பதம்’ என்பதுபோல், விஜய் அரசின் முதல் 100 நாட்கள் சாதனைகளும் சவால்களும் கலந்ததாகவே அமைந்திருக்கிறது என்பதே தற்போதைய அரசியல் மதிப்பீடாக உள்ளது.