பீகார் மாநிலத்தில் சட்டசபை தேர்தலின் இரண்டாம் கட்ட வாக்குப்பதிவு இன்று உற்சாகமாக நடைபெற்று வருகிறது. மொத்தம் 243 தொகுதிகள் கொண்ட இத்தேர்தலில், கடந்த 6ஆம் தேதி நடைபெற்ற முதல் கட்ட வாக்குப்பதிவில் 121 தொகுதிகளில் 65.08% என்ற சாதனைமிக்க வாக்கு சதவீதம் பதிவானது.

இன்று நடைபெறும் இரண்டாம் கட்ட வாக்குப்பதிவில், மீதமுள்ள 122 தொகுதிகளில் வாக்காளர்கள் அதிக அளவில் பங்கேற்று வருகின்றனர். மாநிலம் முழுவதும் 3 கோடி 70 லட்சம் வாக்காளர்கள் வாக்களிக்க தகுதி பெற்றுள்ளனர். வாக்காளர்கள் சீராக வாக்களிக்க 45,399 வாக்குச்சாவடிகள் திறம்பட அமைக்கப்பட்டுள்ளன.

தேர்தல் சுதந்திரமாகவும், வெளிப்படையாகவும் நடைபெற 4 லட்சத்திற்கும் மேற்பட்ட பாதுகாப்பு படையினர் கடமையில் ஈடுபடுத்தப்பட்டுள்ளனர். அதிகாலை 7 மணிக்கு தொடங்கிய வாக்குப்பதிவு மாலை 6 மணி வரை தொடர உள்ளது.மக்கள் அதிகாலை முதலே வாக்குச்சாவடிகளுக்குச் சென்று தங்கள் ஜனநாயக உரிமையைச் செலுத்தி வரிசையில் நின்று வாக்களித்து வருகின்றனர்.

இதனால் பல பகுதிகளில் வாக்குச்சாவடிகள் திருவிழா சூழலை ஒத்திருந்தன.தற்போதைய நிலவரப்படி, காலை 11 மணி வரை 31.38% வாக்குகள் பதிவாகியுள்ளதாக தேர்தல் ஆணையம் தெரிவித்துள்ளது. வாக்குப்பதிவு மாலை வரை மேலும் அதிகரிக்கும் என எதிர்பார்க்கப்படுகிறது.