நாட்டில் டிஜிட்டல் வங்கிப் பயன்பாடு வேகமாக வளர்ச்சி பெற்று வருவதால், அதனுடன் தொடர்புடைய சைபர் குற்றங்கள் மற்றும் நிதி மோசடிகளும் அதே வேகத்தில் அதிகரித்து வருகின்றன. குறிப்பாக KYC, அதாவது "Know Your Customer" நடவடிக்கையை அடிப்படையாகக் கொண்டு நடைபெறும் மோசடிகள், வாடிக்கையாளர்களின் வங்கிக் கணக்குகளை குறிவைக்கும் வகையில் பரவலாக நடைபெற்று வருகின்றன.

இத்தகைய மோசடிகள் பல்வேறு முறையில் நடைபெறுகின்றன. பொதுவாக வங்கி அதிகாரிகளைப் போல ஆள்மாறாட்டம் செய்பவர்கள், வாடிக்கையாளர்களிடம் அவசரசெய்திகளை அனுப்பி, பயத்தை ஏற்படுத்தும் வகையில், அவர்களிடம் OTP, CVV, PIN போன்ற முக்கிய வங்கி விவரங்களை பெற முயல்கின்றனர். "உங்கள் KYC பூர்த்தி செய்யப்படவில்லை. இன்றே மாலை 5:30க்குள் செய்யாவிட்டால் உங்கள் வங்கிக் கணக்கு முடக்கப்படும்" என்ற எச்சரிக்கை மெசேஜ்கள் மூலம் பயனாளிகளை ஏமாற்றுகிறார்கள்.

இந்த மெசேஜ்களில் பொதுவாக சந்தேகத்திற்கிடமான இணையதள இணைப்புகள் வழங்கப்படுவதோடு, சில நேரங்களில் Android சாதனங்களுக்கு APK கோப்புகளை பதிவிறக்கம் செய்யும் வகையிலும் கட்டாயப்படுத்தப்படுகின்றது. இவ்வாறு பதிவிறக்கம் செய்யப்படும் போலியான செயலிகள், பயனாளர்களின் கேமரா, மைக்ரோஃபோன், SMS மற்றும் தொடர்புகள் உள்ளிட்ட தனிப்பட்ட தகவல்களுக்கு அனுமதி கோரும். இதன் மூலம் மோசடிக்காரர்கள் OTP, கடவுச்சொல் போன்ற முக்கிய தரவுகளை திருட முடிகின்றது.

இத்தகைய செயலிகளைப் பெரும்பாலும் Google Play Store அல்லது Apple App Store இற்குப் வெளியே பகிரப்படுவதால், அவை பாதுகாப்பு தரவுகளை மீறுவதற்கான வழிகளை எளிதாக கண்டுபிடிக்கின்றன. CERT-In (Computer Emergency Response Team - India) போன்ற அமைப்புகள் தொடர்ந்து இது போன்ற ஆபத்துகளைப் பற்றிய எச்சரிக்கைகளை வெளியிட்டு வருகின்றன.

இந்நிலையில் ICICI வங்கி, Axis வங்கி, HDFC வங்கி உள்ளிட்ட முன்னணி வங்கிகள், எந்த சந்தர்ப்பத்திலும் KYC புதுப்பிப்பு போன்றவற்றை குறுஞ்செய்திகள் அல்லது மூன்றாம் தரப்பு செயலிகள் மூலமாக கோரமாட்டோம் என்று வலியுறுத்தி வருகின்றன. வாடிக்கையாளர்கள் எச்சரிக்கையாக இருந்து, வங்கியின் அதிகாரப்பூர்வ செயலிகள் மற்றும் இணையதளங்களை மட்டுமே பயன்படுத்த வேண்டும் என்றும் அவர்கள் கூறுகின்றனர்.

இதேபோல், OTP, CVV, ATM PIN போன்ற முக்கிய வங்கி விவரங்களை தொலைபேசி, குறுஞ்செய்தி அல்லது எந்தவொரு இணையதளத்திற்கும் வழங்க வேண்டாம் என வலியுறுத்தப்படுகிறது. சந்தேகத்திற்கிடமான தகவல்கள் வந்தால், உடனடியாக தேசிய சைபர் கிரைம் ஹெல்ப்லைன் 1930 என்ற எண்ணை தொடர்புகொண்டு புகார் அளிக்கலாம். மேலும், www.cybercrime.gov.in மற்றும் www.sancharsaathi.gov.in தளங்களிலும் புகாரளிக்கலாம்.

முடிவாக, இந்த டிஜிட்டல் யுகத்தில் எளிமையான தவறுகள் கூட பெரிய நிதி இழப்புகளை ஏற்படுத்தும் நிலையில், மக்கள் அதிகமான விழிப்புணர்வுடன் நடந்து கொள்ள வேண்டியது அவசியமாகிறது.