கர்நாடக முதல்வர் சித்தராமையாவின் இரண்டரை ஆண்டுப் பதவிக்காலம் நவம்பர் 20-ஆம் தேதியுடன் முடிவடைந்த நிலையில், அடுத்த இரண்டரை ஆண்டுகளுக்கு டி.கே. சிவக்குமார் முதலமைச்சராகப் பதவியேற்பாரா என்ற எதிர்பார்ப்பு காங்கிரஸ் வட்டாரத்தில் எழுந்துள்ளது. இந்த விவகாரம் குறித்துச் சித்தராமையா, காங்கிரஸ் தலைவர் மல்லிகார்ஜுன கார்கேவை நேற்று (நவ. 22) சந்தித்துப் பேசியுள்ளார்.

சந்திப்பு விவரம்: கடந்த ஒரு வாரத்தில் இது சித்தராமையா - கார்கே இடையேயான இரண்டாவது சந்திப்பாகும். இந்த ஒரு மணி நேரத்திற்கும் மேலான சந்திப்பால், முதல்வர் பதவியில் மாற்றம் ஏற்படுமா என்ற கேள்வி எழுந்துள்ளது.

கார்கேவின் பதில்

சந்திப்பிற்குப் பிறகு செய்தியாளர்கள் எழுப்பிய கேள்விக்கு மல்லிகார்ஜுன கார்கே பதிலளிக்கையில்: "பேச்சுவார்த்தை குறித்து நான் எதுவும் சொல்லப்போவதில்லை. நீங்கள் இங்கே நிற்பதால் உங்களுடைய நேரம்தான் செலவாகும். நான் மிகவும் கவலை அடைகிறேன். எதுவாக இருந்தாலும் காங்கிரஸ் மேலிடம் அதைச் செய்யும். நீங்கள் இதைப் பற்றி மேலும் கவலைப்படத் தேவையில்லை."

எம்.எல்.ஏ.க்கள் வருகை

இதற்கிடையே, டி.கே. சிவக்குமாரின் ஆதரவு எம்.எல்.ஏ.-க்கள் சிலர் டெல்லி சென்று கார்கேவைச் சந்தித்ததாகக் கூறப்படுகிறது. எனினும், டெல்லிக்கு எம்.எல்.ஏ.-க்கள் சென்றது தனக்குத் தெரியாது என்று டி.கே. சிவக்குமார் தெரிவித்துள்ளார். கர்நாடக முதல்வர் பதவியில் மாற்றம் குறித்த உச்சகட்டப் பேச்சுவார்த்தைகள் டெல்லியில் நடைபெற்று வருவதால் பரபரப்பு நீடிக்கிறது.