ஹரியாணா மாநிலத்தின் குருகிராம் பகுதி ஒரு கொடூரமான துப்பாக்கிச்சூடு சம்பவத்தால் உறைந்து போயுள்ளது. அசோக் விஹார் காலனியில் வசித்து வந்த அனில் (50) என்ற நபர், குடும்பத்திற்குள் ஏற்பட்ட தீராத மோதலால் தனது மனைவியையும் ஒரே மகனையும் சுட்டுக்கொன்றுள்ளார்.

நீண்ட நாட்களாகவே தம்பதியினரிடையே அடிக்கடி சச்சரவுகள் ஏற்பட்டு வந்த நிலையில், சனிக்கிழமை இரவு மீண்டும் தொடங்கிய வாக்குவாதம் ஞாயிற்றுக்கிழமை அதிகாலை பெரும் உயிர்ச்சேதத்தில் முடிந்தது.

இந்த மோதலில் ஆஷா (45) மற்றும் பிரசாந்த் (25) ஆகியோர் சம்பவ இடத்திலேயே ரத்த வெள்ளத்தில் பலியாகினர். சமாதானம் செய்ய வந்த மகனையும் தந்தை சுட்டது அப்பகுதியில் பெரும் அதிர்ச்சியை ஏற்படுத்தியுள்ளது.

குற்றவாளி அனில், முன்பு விளையாட்டுப் பயிற்சியாளராகவும் உடற்கல்வி ஆசிரியராகவும் பணியாற்றியவர் என்பது குறிப்பிடத்தக்கது. தற்போது தனியார் பாதுகாப்பு அதிகாரியாகப் பணியாற்றி வரும் இவர், தனது பணிக்காக வைத்திருந்த உரிமம் பெற்ற துப்பாக்கியையே இந்தக் கொலைகளுக்குப் பயன்படுத்தியுள்ளார்.

போலீஸார் வரும்போது சடலங்களுக்கு அருகிலேயே அனில் அமர்ந்திருந்த நிலையில், அவர் மீது பாலம் விஹார் காவல் நிலையத்தில் வழக்குப் பதிவு செய்யப்பட்டு விசாரணை நடத்தப்பட்டு வருகிறது.