நாடு முழுவதும் பொதுமக்களுக்கு நிவாரணம் அளிக்கும் வகையில், மத்திய அரசு கிட்டத்தட்ட 175 பொருட்களுக்கு சரக்கு மற்றும் சேவை வரியை (GST) குறைக்க திட்டமிட்டுள்ளது. டெல்லியில் நடைபெற்ற உயர்மட்ட ஆலோசனைகளுக்குப் பிறகு எடுக்கப்பட்ட இந்த நடவடிக்கை, வரவிருக்கும் சீர்திருத்தங்களில் முக்கிய இடத்தைப் பெறவுள்ளது.

மத்திய அரசு வட்டாரங்கள் தெரிவித்ததாவது:“ஜி.எஸ்.டி குறைந்தது 10 சதவீத புள்ளிகள் வரை குறைக்கப்படும். அத்தியாவசியப் பொருட்களுக்கும் கல்விச் சார்ந்த பொருட்களுக்கும் பெரும் நிவாரணம் கிடைக்கும்,” என தகவல்கள் வெளியாகியுள்ளன.

தற்போது 18% வரி விதிக்கப்பட்டிருக்கும் டால்கம் பவுடர், பற்பசை, ஷாம்பூ போன்ற தனிநபர் பராமரிப்புப் பொருட்களுக்கு இனி வெறும் 5% ஜி.எஸ்.டி மட்டுமே விதிக்கப்படும். இதனால் இந்துஸ்தான் யூனிலீவர், கோத்ரேஜ் இண்டஸ்ட்ரீஸ் போன்ற முன்னணி FMCG நிறுவனங்களுக்கு விற்பனையில் ஊக்கம் கிடைக்கும் என்று எதிர்பார்க்கப்படுகிறது.

ஏ.சி, டி.வி போன்ற நுகர்வோர் மின்னணு சாதனங்களின் மீதான வரி 28% இலிருந்து 18% ஆகக் குறைக்கப்படும். இதன் மூலம் சாம்சங், எல்.ஜி, சோனி போன்ற மின்னணு நிறுவனங்கள் சந்தையில் அதிகப்படியான தேவை காணலாம் என்று நிபுணர்கள் கூறுகின்றனர்.

சிறிய ஹைப்ரிட் கார்களுக்கான ஜி.எஸ்.டி 28% இலிருந்து 18% ஆகக் குறைக்கப்பட உள்ளது. இது மாருதி சுசுகி, டொயோட்டா போன்ற கார் தயாரிப்பு நிறுவனங்களுக்கு பெரிய ஊக்கமாக அமையும்.

வரைபடங்கள், அட்லஸ்கள், உலக உருண்டைகள், கல்வி விளக்கப்படங்கள், பென்சில்கள், கிரேயான்கள், பேஸ்டல்கள், ஆய்வகக் குறிப்பேடுகள் போன்ற கல்விச் சார்ந்த பொருட்கள் இதுவரை 12% ஜி.எஸ்.டி கீழ் இருந்தன. இனி இவை அனைத்தும் பூஜ்ஜிய வரி (0%) வரம்பில் சேர்க்கப்பட்டுள்ளன.இதனால் மாணவர்கள், பெற்றோர், கல்வி நிறுவனங்களுக்கு பெரும் நிவாரணம் கிடைக்கும் என்று அதிகாரிகள் தெரிவித்துள்ளனர்.

UHT பால், பேக்கேஜ் செய்யப்பட்ட பன்னீர், பிட்சா ரொட்டி, காக்கரா, சப்பாத்தி, ரொட்டி போன்ற உணவுப் பொருட்கள் இனி ஜி.எஸ்.டி விலக்கு பெறுகின்றன. அதோடு, முன்பு 18% வரி விதிக்கப்பட்ட பராட்டா, பரோட்டா போன்ற உணவுப் பொருட்களும் பூஜ்ஜிய வரி வரம்பில் சேர்க்கப்பட்டுள்ளன.

மோட்டார் சைக்கிள்கள் மற்றும் ஸ்கூட்டர்களுக்கு புதிய வரி அமைப்பு கொண்டு வரப்படுகிறது.350 சிசி வரை உள்ள இருசக்கர வாகனங்களுக்கு ஜி.எஸ்.டி 28% → 18% ஆக குறைக்கப்படும். இதனால் இவற்றின் விலை குறையும்.ஆனால் 350 சிசி மற்றும் அதற்கு மேற்பட்ட பைக்குகளுக்கு 40% ஜி.எஸ்.டி விதிக்கப்பட உள்ளது. இதனால் அந்த வகை பைக்குகளின் விலை அதிகரிக்கும்.

மத்திய நிதியமைச்சர் நிர்மலா சீதாராமன் தலைமையில் வரும் செப்டம்பர் 3-4 தேதிகளில் ஜி.எஸ்.டி கவுன்சில் கூடவுள்ளது. அங்கு இந்த மாற்றங்கள் குறித்து இறுதி முடிவு எடுக்கப்படும்.

இந்த நடவடிக்கை, பிரதமர் நரேந்திர மோடி ஆகஸ்ட் 15, 2025 அன்று ஆற்றிய சுதந்திர தின உரையில், “தினசரி பயன்பாட்டுப் பொருட்களின் மீதான வரிகளை குறைப்போம்” என்ற அறிவிப்பின் தொடர்ச்சியாக அமைகிறது.

அதிகாரிகள் தெரிவிக்கையில், இந்த மாற்றங்கள் வரி அமைப்பை எளிமையாக்கவும், வெளிப்படையாக்கவும் மட்டுமல்லாது, குடும்பங்கள், மாணவர்கள் மற்றும் பொதுமக்கள் அனைவருக்கும் நேரடி நிவாரணம் அளிக்கும் என எதிர்பார்க்கப்படுகிறது.