ஆந்திராவின் விசாகப்பட்டினத்தில், உலகின் முன்னணி தொழில்நுட்ப நிறுவனமான கூகுள் நிறுவனம் ரூ. 87,570 கோடி — அதாவது சுமார் 15 பில்லியன் டாலர் முதலீட்டில் ஒரு மெகா டேட்டா சென்டர் அமைக்க ஒப்பந்தம் செய்துள்ளது.

இந்த மாபெரும் திட்டம் இந்தியாவின் வரலாற்றிலேயே மிகப்பெரிய வெளிநாட்டு நேரடி முதலீடுகளில் ஒன்றாகக் கருதப்படுகிறது. 1 ஜிகா வாட் திறன் கொண்ட இந்த டேட்டா சென்டர், ஆந்திராவின் ஐடி வளர்ச்சிக்கு முக்கிய மைல்கல்லாக அமையவிருக்கிறது.

ஆனால், இந்த முதலீடு ஆந்திராவுக்கு சென்றுவிட்டது என்பதையே தமிழ்நாட்டில் அரசியல் கட்சிகள் கடுமையாகப் பேசிக்கொண்டு வருகின்றன. குறிப்பாக, அதிமுக இதை “தமிழ்நாடு அரசின் தோல்வி” என்று குற்றம் சாட்டியுள்ளது.

அதிமுக முன்னாள் அமைச்சர் ஆர்.பி. உதயகுமார், “கூகுள் சிஇஓ சுந்தர் பிச்சை மதுரை மண்ணின் மைந்தர். அவரை நேரடியாக அழைத்து இருந்தால், இந்த டேட்டா சென்டர் தமிழகத்தில்தான் அமைந்திருக்கும்” என விமர்சித்தார்.

இதேபோல், அதிமுக பொதுச்செயலாளர் எடப்பாடி பழனிசாமியும், “சுந்தர் பிச்சை தமிழராக இருந்தும், தமிழக அரசு இதைப் பிடிக்க தவறியது” என்று ஸ்டாலின் அரசை கடுமையாக தாக்கினார்.

இந்த விமர்சனங்களுக்கு திமுக தரப்பும் உடனே பதிலடி கொடுத்தது.தமிழ்நாடு தொழில்துறை அமைச்சர் டி.ஆர்.பி. ராஜா, “கூகுள் ஆந்திராவுக்கு சென்றது அதானியின் தலையீட்டால். அதே நேரத்தில், தமிழ்நாட்டுக்கு ஃபாக்ஸ்கான் மூலம் ₹15,000 கோடி முதலீடு வருகிறது. இது கூகுளை விட பெரியது” என்று தெரிவித்தார்.

ஆனால் பின்னர், ஃபாக்ஸ்கான் நிறுவனமே “அந்த அளவிலான புதிய முதலீடு எதுவும் திட்டமிடப்படவில்லை” என விளக்கம் அளித்தது. இதனால் திமுக அரசின் வாதம் அரசியல் எதிரிகளால் கேள்வி கேட்கப்பட்டது.

இத்தனைக்கும் நடுவே, ஆந்திர மாநிலத்தின் ஐடி அமைச்சர் நாரா லோகேஷ் (முதல்வர் சந்திரபாபு நாயுடுவின் மகன்) தனது எக்ஸ் தளத்தில் ஒரு பதிவு மூலம் பதிலளித்துள்ளார்.
அதிமுகவின் விமர்சனத்தை செய்தியாக வெளியிட்ட ஆங்கில ஊடகத்தின் நியூஸ் கார்டை பகிர்ந்த அவர்,
“சுந்தர் பிச்சை தமிழ்நாட்டை அல்ல, பாரதத்தைத் தேர்ந்தெடுத்துள்ளார்” என பதிவிட்டார்.

இந்த பதிவு தற்போது சமூக வலைதளங்களில் வைரலாகி, “ஆந்திரா vs தமிழ்நாடு” முதலீட்டு விவாதம் மேலும் தீவிரமடைந்துள்ளது.

மொத்தத்தில், கூகுள் டேட்டா சென்டர் ஒப்பந்தம் ஒரு தொழில்துறை செய்தியாகத் தொடங்கியிருந்தாலும், அது தற்போது திமுக-அதிமுக வார்த்தை யுத்தத்தையும், மாநில அரசியல் சூழ்நிலையையும் சூடேற்றியுள்ளது.