ராஜஸ்தான் மாநிலத்தில் நடைபெற்ற நகர்ப்புற உள்ளாட்சித் தேர்தலில் போட்டியிட்ட பாஜக வேட்பாளர் ஒருவர், வெறும் 1 வாக்கு மட்டுமே பெற்ற சம்பவம் அரசியல் வட்டாரத்திலும் சமூக வலைதளங்களிலும் பெரும் கவனத்தைப் பெற்றுள்ளது.

தேர்தல் முடிவுகள் அறிவிப்பு: ராஜஸ்தானில் உள்ள 309 நகர்ப்புற உள்ளாட்சி அமைப்புகளுக்கான தேர்தல் முடிவுகள் செப்டம்பர் 14 அன்று அதிகாரப்பூர்வமாக அறிவிக்கப்பட்டன. இதில் தித்வானா-குச்சமன் மாவட்டத்தில் உள்ள பர்பத்சர் நகராட்சியின் 13-ஆவது வார்டில் பாஜக சார்பில் கைலாஷ்சந்த் போட்டியிட்டார்.

காங்கிரஸ் வேட்பாளர் அபார வெற்றி: மாநில தேர்தல் ஆணையத்தின் அதிகாரப்பூர்வ தரவுகளின்படி, இந்த வார்டில் காங்கிரஸ் வேட்பாளர் ஹினா கானம் 376 வாக்குகள் பெற்று அபார வெற்றி பெற்றார். இவரைத் தொடர்ந்து போட்டியிட்ட சுயேச்சை வேட்பாளர் ரஷீத் கான் 195 வாக்குகளைப் பெற்றார்.

ஒரே ஒரு வாக்கு பெற்ற பாஜக: இந்த வார்டில் களமிறங்கிய பாஜக வேட்பாளர் கைலாஷ்சந்த் வெறும் 1 வாக்கு மட்டுமே பெற்றுத் தோல்வியடைந்தார்.

வேட்பாளர் அளித்த சுவாரசிய விளக்கம்: ஒரே ஒரு வாக்கு பெற்றது குறித்து வேட்பாளர் கைலாஷ்சந்த் கூறுகையில், "எனக்கு ஒரு வாக்கு கிடைத்துள்ளது. எனது வாக்குரிமை 12-ஆவது வார்டில் இருக்கிறது, ஆனால் கட்சி என்னை 13-ஆவது வார்டில் போட்டியிட வைத்தது. எனவே, 13-ஆவது வார்டைச் சேர்ந்த ஏதோ ஒரு வாக்காளர் எனக்கு ஆதரவாக வாக்களித்துள்ளார்" எனத் தெரிவித்துள்ளார்.

பர்பத்சர் நகராட்சி நிலவரம்: மொத்தம் 25 வார்டுகளைக் கொண்ட பர்பத்சர் நகராட்சியில், காங்கிரஸ் கட்சி 13 வார்டுகளிலும், பாஜக 12 வார்டுகளிலும் வெற்றி பெற்றுள்ளன.