இந்திய சினிமா உலகம் என்பது பணம் கொட்டும் துறையாகவே பார்க்கப்படுகிறது. சம்பளம், விளம்பர வருமானம், தயாரிப்பு நிறுவனங்கள், தொழில் முதலீடுகள் என பல்வேறு வழிகளில் சினிமா நட்சத்திரங்கள் பெரும் செல்வந்தர்களாக மாறி வருகின்றனர். அந்த வகையில், இந்தியாவின் முதல் 10 பணக்கார நட்சத்திரங்கள் பட்டியல் தற்போது வெளியாகி உள்ளது. இந்த பட்டியலில் பெரும்பாலும் நடிகர்களே இடம் பிடித்துள்ள நிலையில், ஒரே ஒரு நடிகை மட்டும் இடம்பெற்றுள்ளது என்பது கவனிக்கத்தக்கது.

இந்த பட்டியலில் முதலிடத்தில் உள்ளவர் பாலிவுட் சூப்பர் ஸ்டார் ஷாருக் கான். அவரின் மொத்த சொத்து மதிப்பு சுமார் ரூ.7,300 கோடி என ஐஎம்டிபி உள்ளிட்ட அறிக்கைகள் தெரிவிக்கின்றன. திரைப்பட நடிப்பைத் தவிர, ஐபிஎல் கிரிக்கெட் அணியான கொல்கத்தா நைட் ரைடர்ஸின் இணை உரிமையாளர், ரெட் சில்லீஸ் என்டர்டெயின்மென்ட் தயாரிப்பு நிறுவனம் உள்ளிட்ட பல தொழில்களும் அவரது செல்வம் உயர காரணமாக அமைந்துள்ளன. ஒரு படத்திற்கு ரூ.250 கோடி வரை சம்பளம் வாங்குவதாகவும் கூறப்படுகிறது.

இரண்டாவது இடத்தில் நடிகர் சல்மான் கான் உள்ளார். அவரின் சொத்து மதிப்பு ரூ.6,270 கோடி. தொடர்ந்து பல ஆண்டுகளாக முன்னணி நடிகராக இருந்து வரும் சல்மான் கான், திரைப்படங்கள், தொலைக்காட்சி நிகழ்ச்சிகள் மற்றும் விளம்பரங்கள் மூலமாக பெரும் வருமானம் ஈட்டிவருகிறார். மூன்றாவது இடத்தில் மூத்த நடிகர் அமிதாப் பச்சன் உள்ளார். அவரின் சொத்து மதிப்பு ரூ.5,900 கோடி என மதிப்பிடப்பட்டுள்ளது.

நான்காவது இடம் ரசிகர்களை ஆச்சரியப்படுத்தும் வகையில் நடிகை ஜூஹி சாவ்லாவுக்கு கிடைத்துள்ளது. தற்போது சினிமாவில் அதிகமாக நடிக்காவிட்டாலும், அவரது சொத்து மதிப்பு ரூ.4,600 கோடி. ஷாருக் கானுடன் இணைந்து ரெட் சில்லீஸ் குழுமத்தின் இணை நிறுவனர், கொல்கத்தா நைட் ரைடர்ஸ் அணியின் இணை உரிமையாளர், ரியல் எஸ்டேட் மற்றும் பிற தொழில்களில் முதலீடு செய்துள்ளதன் மூலம், இந்தியாவின் பணக்கார நடிகை என்ற பெருமையை அவர் பெற்றுள்ளார்.

ஐந்தாவது இடத்தில் ஹிரித்திக் ரோஷன் உள்ளார். அவரின் சொத்து மதிப்பு ரூ.4,500 கோடி. ஆறாவது இடத்தில் நடிகரும் தயாரிப்பாளருமான அக்‌ஷய் குமார் ரூ.4,000 கோடி சொத்து மதிப்புடன் இடம் பிடித்துள்ளார். ஏழாவது இடத்தில் நடிகர், தயாரிப்பாளர் மற்றும் இயக்குநரான அஜய் தேவ்கன் உள்ளார். அவரின் சொத்து மதிப்பு ரூ.3,850 கோடி.

எட்டாவது இடத்தில் பாலிவுட்டின் ‘மிஸ்டர் பெர்ஃபெக்ஷனிஸ்ட்’ என அழைக்கப்படும் அமீர் கான் உள்ளார். அவரது சொத்து மதிப்பு ரூ.3,200 கோடி. ஒன்பதாவது இடத்தில் தென்னிந்திய மெகா ஸ்டார் சிரஞ்சீவி ரூ.3,000 கோடி சொத்து மதிப்புடன் இடம் பிடித்துள்ளார். பத்தாவது இடத்தில் நடிகர் நாகார்ஜுனா அக்கினேனி ரூ.2,200 கோடி சொத்து மதிப்புடன் இந்த பட்டியலை நிறைவு செய்கிறார்.

மொத்தத்தில், இந்த பட்டியல் இந்திய சினிமா நட்சத்திரங்கள் வெறும் திரையுலகத்தில் மட்டுமல்லாமல், தொழில் மற்றும் முதலீட்டு உலகிலும் எவ்வளவு பெரிய சக்தியாக உள்ளனர் என்பதை வெளிப்படுத்துகிறது.