இந்தியாவில் எலெக்ட்ரிக் வாகனங்களின் பயன்பாடு தொடர்ந்து அதிகரித்து வருகிறது. பெட்ரோல், டீசல் விலையேற்றம் மற்றும் குறைந்த பராமரிப்பு செலவு போன்ற காரணங்களால் நடுத்தர வர்க்கத்தினர் பலரும் மின்சார வாகனங்களின் பக்கம் திரும்பி வருகின்றனர். குறிப்பாக, ஒரு முறை சார்ஜ் செய்தால் அதிக தூரம் பயணிக்கக்கூடிய எலெக்ட்ரிக் கார்களுக்கான தேவை அதிகரித்துள்ளது. அந்த வகையில், இந்தியாவில் தற்போது அதிக ரேஞ்ச் வழங்கும் முக்கியமான 5 எலெக்ட்ரிக் கார்களைப் பார்க்கலாம்.

எம்ஜி கோமெட் EV
குறைந்த விலையில் நகரப் பயணங்களுக்கு ஏற்ற எலெக்ட்ரிக் கார் என்றால் எம்ஜி கோமெட் முக்கியமான தேர்வாகும். 17.3kWh பேட்டரி கொண்ட இந்த கார் 230 கிலோமீட்டர் வரை ரேஞ்ச் வழங்கும் என ARAI சான்றளித்துள்ளது. 41.43 bhp பவர் மற்றும் 110 Nm டார்க் வழங்கும் இந்த கார், நகரப் பயன்பாட்டுக்கு ஏற்றதாக உள்ளது. இதன் ஆரம்ப விலை ரூ.7.62 லட்சம். ‘Battery as a Service’ திட்டத்தின் கீழ் பேட்டரியை வாடகைக்கு எடுத்தால் குறைந்த விலையில் வாங்கும் வசதியும் உள்ளது.

டாடா டியாகோ EV
நடுத்தர குடும்பங்களுக்கு ஏற்ற எலெக்ட்ரிக் கார்களில் டாடா டியாகோ முக்கிய இடம் பிடித்துள்ளது. 19.2kWh மற்றும் 24kWh என இரண்டு பேட்டரி விருப்பங்களில் கிடைக்கும் இந்த கார், அதிகபட்சமாக 315 கிலோமீட்டர் வரை பயணிக்க முடியும். இதன் ஆரம்ப விலை ரூ.7.99 லட்சம்.

டாடா பன்ச் EV
எஸ்யூவி வகை எலெக்ட்ரிக் கார் வாங்க விரும்புபவர்களுக்கு டாடா பன்ச் சிறந்த தேர்வாக பார்க்கப்படுகிறது. 30kWh மற்றும் 40kWh பேட்டரி பேக்குகளுடன் வரும் இந்த கார், ஒரு முறை சார்ஜில் 420 முதல் 468 கிலோமீட்டர் வரை ரேஞ்ச் வழங்குகிறது. இதன் ஆரம்ப விலை ரூ.9.69 லட்சம்.

சிட்ரோன் eC3
அதிக இடவசதி மற்றும் வசதியான பயண அனுபவத்துக்காக சிட்ரோன் eC3 பலரின் கவனத்தை ஈர்த்துள்ளது. 29.2kWh பேட்டரி கொண்ட இந்த கார், 320 கிலோமீட்டர் வரை ரேஞ்ச் வழங்கும் என நிறுவனம் தெரிவித்துள்ளது. இதன் ஆரம்ப விலை ரூ.11.99 லட்சம்.

மஹிந்திரா XUV 3XO EV
அதிரடி செயல்திறன் மற்றும் மாடர்ன் டிசைன் விரும்புபவர்களுக்கு மஹிந்திராவின் XUV 3XO EV சிறந்த தேர்வாக உள்ளது. 39.4kWh பேட்டரி கொண்ட இந்த கார், ஒரு முழு சார்ஜில் 400 முதல் 450 கிலோமீட்டர் வரை பயணிக்க முடியும். இதன் ஆரம்ப விலை ரூ.13.89 லட்சம்.

எலெக்ட்ரிக் கார்கள் வாங்கும் முன், தினசரி பயணத் தேவைகள், சார்ஜிங் வசதிகள் மற்றும் பராமரிப்பு அம்சங்களை கருத்தில் கொண்டு தேர்வு செய்வது சிறந்தது. இந்திய சந்தையில் தொடர்ந்து புதிய மாடல்கள் அறிமுகமாகி வருவதால், எலெக்ட்ரிக் வாகனத் தேர்வுகள் நாளுக்கு நாள் அதிகரித்து வருகின்றன.