கடந்த சில ஆண்டுகளாக உலகப் பொருளாதாரம் வேகமான மாற்றங்களை சந்தித்து வரும் நிலையில், உலக நாடுகளின் மத்திய வங்கிகள் அமைதியாக ஆனால் தீவிரமாக ஒரு புதிய போட்டியில் இறங்கியுள்ளன. அந்தப் போட்டிதான் தங்கக் குவிப்பு. முன்னெப்போதும் இல்லாத அளவில் சீனா, இந்தியா, போலந்து, துருக்கி உள்ளிட்ட நாடுகள் தங்களின் அமெரிக்க டாலர் கையிருப்புகளை குறைத்து, அதற்குப் பதிலாக டன் கணக்கில் தங்கத்தை வாங்கிச் சேமித்து வருகின்றன.

இந்த திடீர் மாற்றத்தின் பின்னணி, அமெரிக்க டாலர் மீது இருந்த அதீத நம்பிக்கையை குறைப்பதே என பொருளாதார வல்லுநர்கள் சுட்டிக்காட்டுகின்றனர். உலகப் பொருளாதாரம் தற்போது “டாலர் நீக்கம் (De-Dollarization)” என்ற புதிய கட்டத்தை நோக்கி நகர்கிறது. குறிப்பாக 2022-ஆம் ஆண்டு ரஷ்யாவின் வெளிநாட்டு நாணயக் கையிருப்புகள் முடக்கப்பட்ட சம்பவத்துக்குப் பிறகு, வளரும் நாடுகள் தங்கள் பணத்தை முழுமையாக டாலராக வைத்திருப்பது பாதுகாப்பானதா என்ற கேள்வி எழுப்பத் தொடங்கின.

தங்கத்தை நோக்கி மத்திய வங்கிகள் திரும்புவதற்கான முக்கிய காரணங்கள் பல. அரசியல் தடைகள் அல்லது போர் சூழ்நிலைகளில் கூட தங்கம் எந்த ஒரு நாட்டின் கட்டுப்பாட்டிலும் இல்லாத சொத்து என்பதால், அதை முடக்க முடியாது. அதேபோல், அதிக பணவீக்கம் காரணமாக டாலரின் மதிப்பு தேய்மானம் அடையும் சூழலில், தங்கம் நீண்ட கால அடிப்படையில் தனது மதிப்பைத் தக்கவைத்துக் கொள்ளும் பாதுகாப்பு முதலீடாக பார்க்கப்படுகிறது. மேலும், “அனைத்து முட்டைகளையும் ஒரே கூடையில் வைக்கக் கூடாது” என்ற கோட்பாட்டின்படி, நாடுகள் தங்கள் நாணயக் கையிருப்பில் தங்கத்தையும் சேர்த்துக் கொண்டு ஆபத்துகளைப் பகிர்ந்து கொள்கின்றன.

இந்தியாவில், இந்திய ரிசர்வ் வங்கி கடந்த ஆண்டில் மட்டும் சுமார் 57 டன் தங்கத்தை கூடுதலாக வாங்கியுள்ளது. இதன் மூலம் இந்தியாவின் மொத்த தங்கக் கையிருப்பு 880 டன்னைக் கடந்து புதிய உச்சத்தை எட்டியுள்ளது. உலகளவில் அதிக தங்கம் வைத்திருக்கும் நாடுகளின் பட்டியலில் அமெரிக்கா இன்னும் முதலிடத்தில் இருந்தாலும், வளரும் நாடுகள் அந்த இடைவெளியை வேகமாகக் குறைத்து வருகின்றன.

சீனா கடந்த 15 மாதங்களாக தொடர்ந்து தங்கம் வாங்கி வருவதுடன், சமீப காலமாக கொள்முதல் வேகத்தை இரட்டிப்பாக்கியுள்ளது. ஐரோப்பாவின் பொருளாதார பாதுகாப்பை கருத்தில் கொண்டு போலந்து கடந்த ஓராண்டில் 100 டன்னுக்கும் அதிகமான தங்கத்தை சேர்த்துள்ளது. ஆசியப் பிராந்தியத்தில் இந்தியா தங்கத்தை ஒரு முக்கிய பொருளாதார ஆயுதமாக பயன்படுத்தத் தொடங்கியுள்ளதாகவும் கூறப்படுகிறது.

இந்த தங்கக் குவிப்பு வெறும் முதலீட்டு நடவடிக்கை அல்ல; இது உலகளாவிய நிதி அதிகார மாற்றத்தை (Power Shift) சுட்டிக்காட்டும் முக்கிய அறிகுறி. டாலரை மட்டுமே மையமாக வைத்திருந்த நிதி அமைப்பு மெல்ல மாறி, மீண்டும் “உலோகங்களின் அரசன்” என அழைக்கப்படும் தங்கம் முன்னணிக்கு வருவதாக பொருளாதார வல்லுநர்கள் மதிப்பிடுகின்றனர். இதன் விளைவாக, நீண்ட காலத்தில் தங்கத்தின் விலை மேலும் புதிய உச்சங்களைத் தொடும் வாய்ப்பு அதிகம் என கணிக்கப்படுகிறது.

கடந்த வாரத்தின் கடும் வீழ்ச்சிக்குப் பிறகு, திங்கட்கிழமை சந்தை திறக்கப்படும்போது முதலீட்டாளர்களின் கவனம் முழுவதும் உலக மத்திய வங்கிகளின் அடுத்தகட்ட நகர்வுகள் மீது திரும்பியுள்ளது. விலை சரிந்தாலும், People’s Bank of China மற்றும் இந்திய ரிசர்வ் வங்கி போன்ற நிறுவனங்கள் அதை “தள்ளுபடி விலை” எனக் கருதி தொடர்ந்து வாங்குவதால், தங்கம் ஒரு குறிப்பிட்ட அளவுக்குக் கீழே சரிவதை இது தடுக்கக்கூடும்.

தனிநபர் முதலீட்டாளர்கள் பயத்தில் விற்பனை செய்தாலும், மத்திய வங்கிகளின் தொடர்ச்சியான கொள்முதல் காரணமாக விலை வலுவான ஆதரவு நிலையில் இருக்கும் என எதிர்பார்க்கப்படுகிறது. இந்தியச் சந்தையில், திருமண சீசன் தேவையுடன் சேர்ந்து மத்திய வங்கியின் கொள்முதல் வேகம் அதிகரித்தால், வரும் நாட்களில் ஆபரணத் தங்கத்தின் விலையில் உயர்வு காணப்படும் வாய்ப்பும் உள்ளது.