மின்சார வாகன உலகில் கடும் போட்டி நிலவி வரும் நிலையில், அமெரிக்க எலக்ட்ரிக் வாகன மாபெரும் நிறுவனம் டெஸ்லா, தன்னுடைய மிகப் பிரபலமான எஸ்யூவியான மாடல் Y-இன் புதிய, மலிவு விலை பதிப்பை அறிமுகப்படுத்தி அதிரடி கிளப்பியுள்ளது.

‘ஸ்டாண்டர்டு’ என அழைக்கப்படும் இந்த புதிய மாடலின் விலை 41,630 டாலர்கள், அதாவது சுமார் 34.7 லட்சம் இந்திய ரூபாய். இதுவரை விற்பனையில் இருந்த அடிப்படை மாடலைவிட இது சுமார் 5,000 டாலர்கள் (அல்லது 4.2 லட்சம் ரூபாய்) குறைவானது. விலை குறைப்பு சுமார் 15 சதவீதம், ஆனால் தரத்தில் எந்தச் சமரசமும் இல்லை என்பதே டெஸ்லாவின் வலியுறுத்தல்.

புதிய மாடல் Y, வெளிப்புறத்தில் முந்தைய மாடலைப் போலவே தோற்றமளிக்கிறது. ஆனால் சில நுணுக்கமான மாற்றங்கள் செய்யப்பட்டுள்ளன.

முன்பு இருந்த பனோரமிக் கிளாஸ் கூரை இப்போது மெட்டல் கூரையாக மாற்றப்பட்டுள்ளது, இதனால் கேபின் இன்சுலேஷன் மேம்பட்டுள்ளது. உள்ளே லெதர் இருக்கைகளுக்கு பதிலாக துணி இருக்கைகள், முன்புற லைட் பார் எளிய பாரம்பரிய விளக்குகள், என பல சிறிய மாற்றங்கள் செய்யப்பட்டுள்ளன.

இருப்பினும், டெஸ்லாவின் அடையாளமான மினிமலிஸ்ட் வடிவமைப்பு, ஏரோடைனமிக் தோற்றம், மற்றும் ஃப்ளஷ் டோர் ஹேண்டில்கள் ஆகியவை அதேபடி தக்கவைக்கப்பட்டுள்ளன.

உள்ளமைப்பைப் பார்த்தால் — 15.4 அங்குலம் அளவிலான பெரிய டச்ஸ்கிரீன் இன்னும் மையமாகவே உள்ளது. ஆனால் விலையை குறைக்க சில அம்சங்கள் நீக்கப்பட்டுள்ளன:ஸ்டீயரிங் தற்போது கைமுறையாக சரிசெய்யப்படும், முன் இருக்கைகளுக்கு வென்டிலேஷன் இல்லை, பின்புறம் ஹீட்டிங் வசதி நீக்கப்பட்டுள்ளது, மேலும் பின் பயணிகளுக்கான திரை முழுமையாக அகற்றப்பட்டுள்ளது.

செயல்திறனில், பெரிய குறைப்புகள் இல்லை. இந்த மாடலில் பின்புறத்தில் பொருத்தப்பட்ட எலக்ட்ரிக் மோட்டார், 69.5 kWh பேட்டரி உடன் 300 ஹார்ஸ் பவர் சக்தி வழங்குகிறது. ஒரே சார்ஜில் 517 கிலோமீட்டர் வரை பயணிக்க முடியும் என்றும், 0 முதல் 100 கிமீ வேகத்தை 6.8 வினாடிகளில் எட்டும் என்றும் டெஸ்லா தெரிவித்துள்ளது.

இப்போது கேள்வி — இந்தியாவிலும் அறிமுகமாகுமா?
தற்போது இந்தியாவில் டெஸ்லா மாடல் Y-இன் RWD மாடல் சுமார் 63.11 லட்சம் ரூபாய், மற்றும் லாங் ரேஞ்ச் மாடல் சுமார் 71.71 லட்சம் ரூபாய் விலையில் விற்கப்படுகிறது.

இந்நிலையில், உலகளவில் அறிமுகமான இந்த மலிவு விலை ஸ்டாண்டர்டு மாடலை இந்தியாவிலும் கொண்டு வருமா என்பதே வாகன ரசிகர்கள் அனைவரின் எதிர்பார்ப்பு.

மொத்தத்தில் — போட்டியாளர்களை முந்தி செல்ல டெஸ்லா எடுத்துள்ள இந்த விலை குறைப்பு முடிவு,மின்சார வாகன சந்தையில் ஒரு புதிய போட்டி அலைக்கு வழிவகுக்கப் போவதாக வல்லுநர்கள் கூறுகின்றனர்.