சமூக வலைதளமான ‘ரெடிட்’ தளத்தில், ஒரு நிறுவனத்தின் மூத்த அதிகாரி பகிர்ந்த பதிவு தொழில்துறை வட்டாரங்களில் பரபரப்பை ஏற்படுத்தியுள்ளது. அந்த பதிவில், “கடந்த 34 ஆண்டுகளாக செயல்பட்டு வரும் எங்கள் நிறுவனத்திற்கு மை உற்பத்திக்கான 3 ஆலைகள் இயங்கி வருகின்றன.

ஆனால், சமீப காலமாக இந்திய சந்தையில் சீனாவிலிருந்து மிகக் குறைந்த விலையில் மை இறக்குமதி அதிகரித்து வருகிறது. அந்த விலையுடன் போட்டியிட எங்களுக்கு இயலாமல், கடந்த 3 ஆண்டுகளாக நிறுவனம் கடுமையான நஷ்டத்தைச் சந்தித்து வருகிறது. இதனால் தவிர்க்க முடியாத சூழலில், 3 ஆலைகளில் 2 ஆலைகளை மூடும் கடினமான முடிவை நிர்வாகம் எடுத்துள்ளது.

இந்த தீர்மானத்தின் விளைவாக, 1,934 நிரந்தர ஊழியர்கள் மற்றும் 896 ஒப்பந்த தொழிலாளர்கள் என மொத்தம் 2,800-க்கும் மேற்பட்டோர் வேலை இழந்துள்ளனர்.

மேலும், 72 பேர் கொண்ட தகவல் தொழில்நுட்பக் குழுவும் வெறும் 8 பேராகக் குறைக்கப்பட்டுள்ளது.பணிநீக்கம் செய்யப்பட்ட ஊழியர்களுக்கு வழங்கப்பட்ட இழப்பீடு குறித்தும் எனக்கு மனவேதனை உள்ளது. ஊழியர்களுக்கு குறைந்தது 3 முதல் 5 மாத ஊதியம் அளிக்க வேண்டும் என நான் பரிந்துரைத்தேன்.

ஆனால் நிர்வாகம் மிகவும் குறைந்த அளவிலான இழப்பீட்டை, அதாவது 2 வார ஊதியம் மற்றும் பணிக்காலத்தை அடிப்படையாகக் கொண்ட சிறிய தொகையை மட்டுமே ஒப்புதல் அளித்துள்ளது” என அவர் தெரிவிக்கப்படுகின்றது.

நிறுவனத்தின் இந்த முடிவால் கடும் அதிருப்தி அடைந்த அந்த அதிகாரி, தமது பதவியிலிருந்து விலகி ஜெர்மனிக்குச் செல்லத் தீர்மானித்துள்ளார்..