ரஷ்ய அதிபர் விளாடிமிர் புதின், இந்திய-ரஷ்ய உறவுகளை மேலும் வலுப்படுத்தும் நோக்கில் டிசம்பர் 4 & 5 தேதிகளில் இந்தியாவுக்கு வரவிருக்கிறார். பிரதமர் நரேந்திர மோடி அவர்களின் அழைப்பின் பேரில் நடைபெறும் இந்தச் சுற்றுப்பயணம் இருநாடுகளுக்கும் இடையிலான வர்த்தகம், அரசியல், தொழில்நுட்பம், பாதுகாப்பு மற்றும் கலாச்சார ஒத்துழைப்புகளை மறுபரிசீலனை செய்து மேலும் வளர்க்கவுள்ள முக்கியமான நிகழ்வாகக் கருதப்படுகிறது.

இதுகுறித்து ரஷ்ய வெளியுறவு அமைச்சகம் உத்தியோகபூர்வமாக அறிவிப்பு வெளியிட்டுள்ளது.ஏற்கனவே இந்தியா -ரஷ்யா இடையிலான 23வது வருடாந்திர உச்சி மாநாட்டும் புதினின் வருகையுடன் நடைபெறவிருக்கிறது. பயணத்தின் முடிவில் பல முக்கியமான பொருளாதார மற்றும் பாதுகாப்பு தொடர்பான கூட்டு அறிக்கைகள் வெளியிடப்படும் என எதிர்பார்க்கப்படுகிறது.

மேலும் வர்த்தகம், பாதுகாப்பு, மனிதாபிமானம், விஞ்ஞானம், தொழில்நுட்பம் போன்ற பல துறைகளில் விரிவான புரிந்துணர்வுகள் கையெழுத்தாகும் வாய்ப்பும் உறுதி செய்யப்படுகிறது.புதின் தனது பயணத்தின் போது குடியரசுத் தலைவர் திரவுபதி முர்முவையும் சந்திக்கிறார்.

இருநாடுகளுக்கும் இடையே நடந்த கடைசி முக்கிய சந்திப்பு செப்டம்பர் மாதம் சீனாவின் தியான்ஜின் நகரில் நடைபெற்ற SCO மாநாட்டில் நிகழ்ந்தது. அப்போது புதின் தனது ஆடம்பர லிமோசின் காரில் மோடியை அழைத்து சென்ற நிகழ்வு சர்வதேச ஊடகங்களில் பெரும் கவனத்தை பெற்றது.
இருவரும் 45 நிமிடங்கள் காருக்குள்ளே தனிப்பட்ட உரையாடலில் ஈடுபட்டதும், பின்னர் ஒரு மணி நேரத்துக்கும் மேலாக உத்தியோகப்பூர்வ பேச்சுவார்த்தை நடத்தியதும் வெளிநாட்டு வட்டாரங்களில் பெரிய பேச்சாக மாறி இருந்தது.
இந்தியா-ரஷ்யா நீண்டகால நெருக்கத்தின் அடையாளமாய்
பாதுகாப்பு ஒப்பந்தங்கள்
ஆயுத விநியோக உறவு
எண்ணெய் கொள்முதல்
வர்த்தக முன்னேற்றம்
எல்லாமே பல ஆண்டுகளாக நிலைத்த நிலையில் உள்ளது. குறிப்பாக கடந்த மூன்று ஆண்டுகளாக ரஷ்யா-உக்ரைன் போர் தொடங்கி இருந்து, ரஷ்ய எண்ணெய் இறக்குமதியில் இந்தியா முன்னிலை பெற்றது. இத்திட்டம் அமெரிக்கா கடுமையாக எதிர்த்திருந்தாலும், இந்தியா & ரஷ்யா வணிக உறவில் தடையில்லாமல் செயல்பட்டு வந்திருப்பது குறிப்பிடத்தக்கது.இந்த வருகை இருநாடுகளின் சர்வதேச தளத்திலான அணுகுமுறையையும், எதிர்கால உலக சக்தி சமநிலையையும் பாதிக்கக்கூடிய உயர்நிலை கூட்டணியின் புதிய அத்தியாயம் என மதிக்கப்படுகிறது.