பொதுவாக தங்கம், வைரம், கச்சா எண்ணெய் போன்றவற்றின் விலை உயர்வே உலக சந்தைகளில் பெரிய தாக்கத்தை ஏற்படுத்தும். ஆனால் சர்வதேச மீன் சந்தையில் ஒரு குறிப்பிட்ட மீன் கோடிக்கணக்கான ரூபாய்க்கு ஏலம் போவது பலரையும் ஆச்சரியத்தில் ஆழ்த்தியுள்ளது. அந்த மீன் தான் உலகப் புகழ்பெற்ற புளூஃபின் டுனா (Bluefin Tuna).

உலகிலேயே அதிக விலைக்கு விற்கப்படும் மீன் வகைகளில் புளூஃபின் டுனா முக்கிய இடம் பிடித்துள்ளது. ஜப்பானின் டோக்கியோவில் ஆண்டுதோறும் நடைபெறும் முதல் மீன் ஏலத்தில், இந்த மீன்களுக்கு அபாரமான விலை கிடைப்பது வழக்கம். சமீபத்திய ஏலங்களில் சில புளூஃபின் டுனாக்கள் கோடிக்கணக்கான ரூபாய்க்கு விற்கப்பட்ட சம்பவங்கள் உலக கவனத்தை ஈர்த்துள்ளன.

ஜப்பானிய கலாச்சாரத்தில் ஆண்டின் முதல் ஏலத்தில் உயர்ந்த விலைக்கு மீன் வாங்குவது அதிர்ஷ்டத்தின் அடையாளமாகக் கருதப்படுகிறது. இதனால் உணவுத் தேவையைத் தாண்டி, அந்தஸ்தின் அடையாளமாகவும் இந்த மீன்கள் பார்க்கப்படுகின்றன.

புளூஃபின் டுனாவை பிடிப்பது சாதாரண மீன்பிடித்தல் அல்ல; அது ஒரு வகை வேட்டையாகவே கருதப்படுகிறது. மற்ற மீன்களைப் போல வலைகளில் பிடிக்காமல், பெரும்பாலும் தனிப்பட்ட தூண்டில் முறையிலேயே பிடிக்கப்படுகிறது. காரணம், மீனின் உடலில் காயம் ஏற்பட்டால் அதன் இறைச்சித் தரம் குறையும்.

குறிப்பாக சுஷி உணவுகளில் பயன்படுத்தப்படும் ஒட்டோரோ (Otoro) எனப்படும் கொழுப்பு நிறைந்த பகுதி மிகவும் விலையுயர்ந்ததாகும். அதனால், மீனை காயப்படுத்தாமல் பிடிப்பது மிக முக்கியமாக கருதப்படுகிறது.

இப்போது மீனவர்கள் பாரம்பரிய முறைகளை மட்டும் நம்புவதில்லை. கடலின் நடுவே ட்ரோன்கள், ஹெலிகாப்டர்கள், சோனார் கருவிகள் மற்றும் செயற்கைக்கோள் கண்காணிப்பு மூலம் மீன்களின் இருப்பிடத்தை துல்லியமாக கண்டறிந்து வேட்டையாடுகின்றனர்.

இதற்காக பல நாடுகள் தங்களது மீனவர்களுக்கு தொழில்நுட்ப ஆதரவு வழங்குகின்றன. காரணம், ஒரு பெரிய புளூஃபின் டுனா கிடைத்தால் அது ஒரு குடும்பத்தின் பொருளாதார நிலையை முழுமையாக மாற்றக்கூடிய அளவுக்கு மதிப்புள்ளதாம்.

புளூஃபின் டுனாவுக்கு அடுத்தபடியாக இந்தியாவில் கோல் மீன் (Ghol Fish) கூட அதிக விலைக்கு விற்கப்படுகிறது. அதன் உடலின் swim bladder மருத்துவ மற்றும் அழகு சாதனத் தயாரிப்புகளில் பயன்படுத்தப்படுவதால், ஒரு மீனே லட்சக்கணக்கில் விற்கப்படுகிறது.

அதேபோல் அலங்கார மீன் சந்தையில் ஆசிய அரோவனா (Asian Arowana) போன்ற அபூர்வ மீன்களும் கோடிக்கணக்கில் விற்பனையாகின்றன.

இந்த மீன்களின் விலையை நிர்ணயிப்பதில் மூன்று முக்கிய காரணங்கள் உள்ளன:

• அபூர்வ தன்மை மற்றும் குறைந்த கிடைக்கும் நிலை

• உயர் தரமான இறைச்சி மற்றும் சிறப்பு உணவுப் பயன்பாடு

• மருத்துவம் மற்றும் தொழில்துறை பயன்பாடுகள்

ஆனால் அதிக லாபத்தை நோக்கி நடைபெறும் இந்த வேட்டை, கடல்சார் உயிரியல் சமநிலையை பாதிக்கும் அபாயமும் கொண்டுள்ளது. குறிப்பாக புளூஃபின் டுனா போன்ற சில இனங்கள் அதிக மீன்பிடித்தலால் ஆபத்தான நிலையில் உள்ளதாக சுற்றுச்சூழல் ஆர்வலர்கள் எச்சரிக்கின்றனர்.

கடல் வளங்கள் பொருளாதார ரீதியாக மதிப்புமிக்கவை என்றாலும், அவற்றை பாதுகாப்புடன் பயன்படுத்துவது அவசியம். இல்லையெனில், இன்று “நீலத் தங்கம்” என்று அழைக்கப்படும் இந்த மீன்கள், நாளை வரலாற்றுப் புகைப்படங்களாக மட்டுமே மிஞ்சிவிடும்.