தமிழகத்தின் பல பகுதிகளில் மழை வாய்ப்பு நிலவுவதாக சென்னை வானிலை ஆய்வு மையம் தெரிவித்துள்ளது. தென்கிழக்கு அரபிக்கடல் மற்றும் லட்சத்தீவு–கேரளா கடலோரப் பகுதிகளின் மேல் உருவான வளிமண்டல கீழடுக்கு சுழற்சி மற்றும் குமரிக்கடலை ஒட்டிய பகுதிகளில் நிலவும் மற்றொரு சுழற்சி காரணமாக, அடுத்த சில நாட்களுக்கு வானிலையில் மாற்றங்கள் ஏற்படுகின்றன.

இதன் தாக்கமாக, இன்று தென் தமிழகம், டெல்டா மாவட்டங்கள், நீலகிரி, கோயம்புத்தூர், திருப்பூர் மலைப்பகுதிகள் மற்றும் காரைக்கால் பகுதிகளில் இடைக்கிடை லேசானது முதல் மிதமான மழை பெய்யக்கூடும். மற்ற பகுதிகளில் வறண்ட வானிலை தொடரும் என தெரிவிக்கப்பட்டுள்ளது.

நாளை மேற்கு தொடர்ச்சி மலை மாவட்டங்களில் மழை வாய்ப்பு இருக்கும் நிலையில், மாநிலத்தின் பெரும்பாலான இடங்களில் வறண்ட நிலை நீடிக்கும். அதேசமயம், வேலூர், ராணிபேட்டை, நீலகிரி,கிருஷ்ணகிரி, திருப்பத்தூர் மற்றும் திண்டுக்கல் மாவட்டங்களில் அதிகாலை நேரங்களில் மிதமான பனிமூட்டம் காணப்படும்.

3ஆம் தேதி முழுவதும் வறண்ட வானிலை நிலவும் நிலையில், 4ஆம் தேதி மீண்டும் தென் மாவட்டங்கள் மற்றும் மலைப்பகுதிகளில் மழை சாத்தியம் உள்ளது. 5ஆம் தேதி தென் தமிழக கடலோரப் பகுதிகளில் மட்டும் சிறிய அளவு மழை பெய்யக்கூடும்.சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும்.

அதிகபட்ச வெப்பநிலை 30–31°C வரை உயரக்கூடும்; குறைந்தபட்சம் 23–24°C இருக்கும்.
மீனவர்களுக்கு எச்சரிக்கை:
இன்று முதல் 5ஆம் தேதி வரை தென் தமிழக கடலோரம், மன்னார் வளைகுடா மற்றும் குமரிக்கடல் பகுதிகளில் மணிக்கு 35–45 கி.மீ வேகத்தில் காற்று வீசக்கூடும்; இடையிடையே 55 கி.மீ வரை அதிகரிக்கும் அபாயம் உள்ளது.

மேலும், 4ஆம் தேதி தெற்கு வங்கக்கடல் மற்றும் இந்தியப் பெருங்கடல் பகுதிகளிலும் பலத்த காற்று வீச வாய்ப்பு இருப்பதால், மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது.மொத்தத்தில், தமிழகத்தில் அடுத்த சில நாட்களுக்கு மழை–பனி–பலத்த காற்று என கலவையான வானிலை நிலவவுள்ளதாக வானிலை மையம் தெரிவித்துள்ளது.