ஸ்ரீஹரிகோட்டாவில் இன்று (திங்கட்கிழமை) இந்தியாவின் விண்வெளி வரலாற்றில் மற்றொரு முக்கிய அத்தியாயம் எழுதப்பட்டது. பி.எஸ்.எல்.வி–சி62 ராக்கெட்டுக்கான 24 மணி நேர கவுண்ட்டவுன் நேற்று காலை துல்லியமாக 10.17 மணிக்கு தொடங்கிய நிலையில், அதே நேரத்தில் இன்று காலை 10.17 மணிக்கு ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்தின் முதல் ஏவுதளத்தில் இருந்து ராக்கெட் வெற்றிகரமாக விண்ணில் ஏவப்பட்டது.

புத்தாண்டில் இஸ்ரோ மேற்கொண்ட முதல் ராக்கெட் ஏவுதல் என்பதால், இந்த நிகழ்வு விஞ்ஞானிகள் மட்டுமின்றி நாடு முழுவதும் பெரும் உற்சாகத்தை ஏற்படுத்தியது. ஏவுதலுக்கான அனைத்து கட்டங்களும் திட்டமிட்டபடி நிறைவேறிய நிலையில், ராக்கெட் துல்லியமாக தனது பயணத்தை தொடங்கியது.

இந்த ராக்கெட்டின் மூலம், மத்திய அரசின் பாதுகாப்பு ஆராய்ச்சி மற்றும் மேம்பாட்டு அமைப்பு (டி.ஆர்.டி.ஓ.) உருவாக்கிய இ.ஓ.எஸ்–என்1 என்ற முதன்மை செயற்கைக்கோள் வெற்றிகரமாக விண்வெளியில் நிலைநிறுத்தப்பட்டது. இதனுடன், ஸ்பெயின் நிறுவனத்தால் உருவாக்கப்பட்ட ‘கெஸ்ட்ரல் இனிஷியல் டெமான்ஸ்ட்ரேட்டர்’ என்ற சிறிய சோதனை கருவியும் இணைக்கப்பட்டுள்ளது.

மேலும், இந்தியா, மொரீஷியஸ், லக்சம்பர்க், ஐக்கிய அரபு அமீரகம், சிங்கப்பூர், ஐரோப்பா மற்றும் அமெரிக்காவைச் சேர்ந்த ஆராய்ச்சி மற்றும் வணிக நிறுவனங்களின் 17 வணிக செயற்கைக்கோள்களும் ஒரே ராக்கெட்டின் மூலம் விண்ணில் ஏவப்பட்டுள்ளன. இந்த வெற்றிகரமான ஏவுதல், இந்தியாவின் விண்வெளி திறனை மீண்டும் ஒருமுறை உலகுக்கு எடுத்துக்காட்டியுள்ளது.