தமிழக சட்டப்பேரவைத் தேர்தலை முன்னிட்டு வேட்பாளர்கள் தாக்கல் செய்துள்ள சொத்து விவரங்கள் பொதுமக்கள் மற்றும் அரசியல் வட்டாரங்களில் பெரிய விவாதத்தை ஏற்படுத்தியுள்ளது. குறிப்பாக சினிமா மற்றும் தொழில்துறையிலிருந்து அரசியலுக்கு வந்துள்ளவர்களின் சொத்து மதிப்புகள் கவனம் ஈர்த்துள்ளன.

முதலிடம் – நடிகர் விஜய்
தமிழக வெற்றிக் கழக தலைவர் விஜய், ரூ.600 கோடிக்கும் மேற்பட்ட சொத்து மதிப்புடன் பட்டியலில் முதலிடத்தில் உள்ளார். அவரிடம் ரூ.404 கோடி அசையும் சொத்துகளும், ரூ.115 கோடி அசையா சொத்துகளும் உள்ளன. மேலும் தங்கம், லக்ஷரி கார்கள் உள்ளிட்ட சொத்துகளும் குறிப்பிடப்பட்டுள்ளன.

2வது இடம் – ஜோஸ் சார்லஸ் மார்ட்டின்
லாட்டரி தொழிலதிபர் குடும்பத்தைச் சேர்ந்த இவர், சுமார் ரூ.597 கோடி சொத்து மதிப்பை அறிவித்துள்ளார். பங்கு முதலீடுகள், தங்கம், வைரங்கள் உள்ளிட்ட பெரிய அளவிலான முதலீடுகள் இவரிடம் உள்ளன.

3வது இடம் – ஆதவ் அர்ஜுனா (தவெக)
வில்லிவாக்கம் தொகுதியில் போட்டியிடும் ஆதவ் அர்ஜுனா, ரூ.197 கோடி சொத்து மதிப்பையும், அவரது மனைவி டெய்சிக்கு ரூ.245 கோடி சொத்துகளும் உள்ளதாக தெரிவித்துள்ளார். மொத்த குடும்ப சொத்து ரூ.442 கோடியை கடந்துள்ளது.

4வது இடம் – எஸ்.பி. வேலுமணி (அதிமுக)
முன்னாள் அமைச்சர் எஸ்.பி. வேலுமணி, சுமார் ரூ.150–180 கோடி மதிப்பிலான சொத்துக்களை வைத்திருப்பதாக குறிப்பிடப்பட்டுள்ளது.

5வது இடம் – நயினார் நாகேந்திரன் (பாஜக)
பாஜக தலைவர் நயினார் நாகேந்திரனின் மொத்த சொத்து மதிப்பு ரூ.100 கோடியை கடந்துள்ளதாக கணிக்கப்பட்டுள்ளது. அவருக்கும் அவரது மனைவிக்கும் சேர்த்து பல கோடி மதிப்பிலான அசையும் மற்றும் அசையா சொத்துக்கள் உள்ளன.

இந்த விவரங்கள், அரசியலில் பணப்பலம் எந்தளவிற்கு முக்கிய பங்கு வகிக்கிறது என்ற கேள்வியை மீண்டும் எழுப்பியுள்ளது. தேர்தல் களத்தில் இந்த கோடீஸ்வர வேட்பாளர்கள் எவ்வாறு செயல்படுவார்கள் என்பது பெரும் எதிர்பார்ப்பை ஏற்படுத்தியுள்ளது.