நடைபெறவிருக்கும் சட்டமன்ற பொதுத் தேர்தலை முன்னிட்டு வரும் 4-ந்தேதி (ஞாயிற்றுக்கிழமை) முதல் வாக்குப்பதிவு நாளான 6-ந்தேதி நள்ளிரவு வரையில், தூத்துக்குடி, நெல்லை மாவட்டங்களில் டாஸ்மாக் கடைகள் மூடப்படும் என்று அம்மாவட்ட ஆட்சியர்கள் அறிவிப்பு வெளியிட்டுள்ளனர். மேலும், வாக்கு எண்ணிக்கை நாளானமே மாதம் 2-ந்தேதியும் டாஸ்மாக் கடைகள் மூடப்படும் என்று அறிவிக்கப்பட்டுள்ளது.

இதுகுறித்து நெல்லை மாவட்ட ஆட்சியர் விஷ்ணு விடுத்துள்ள அறிக்கையில், :-

"நெல்லை மாவட்டத்தில் நடைபெறவிருக்கும் தேர்தலை முன்னிட்டு வருகிற 4-ந்தேதி முதல் 6-ந்தேதி நள்ளிரவு வரையிலும், வாக்கு எண்ணிக்கை நாளான மே மாதம் 2-ந்தேதியும் மதுபான சில்லறை கடைகள் மற்றும் அதனுடன் இணைந்த பார்களை அடைக்க வேண்டும்.

மேலும் எப்.எல்.-2 முதல் எப்.எல்.11 வரையிலான உரிமதலம் கொண்ட அனைத்து கடைகளும் மூடப்பட வேண்டும்.

இதேபோல், தூத்துக்குடி மாவட்ட ஆட்சியர் செந்தில்ராஜ் விடுத்துள்ள அறிக்கையில்,

"சட்டமன்ற பொதுத் தேர்தலையொட்டி வருகிற 4-ந்தேதி முதல் 6-ந்தேதி இரவு வரையிலும், வாக்கு எண்ணிக்கை நாளான வருகிற மே மாதம் 2-ந்தேதியும் மதுக்கடைகள் அடைக்கப்பட்டு இருக்கும். எப்.எல்.-2 மற்றும் எப்.எல்.3 உரிமதலம் கொண்ட அனைத்து கடைகளும் மூடப்பட வேண்டும். இதில் எப்.எல்.6-க்கு விதிவிலக்காகும்.

இந்த காலகட்டத்தில் ஒரு இடத்தில் இருந்து மற்றொரு இடத்திற்கு மது கடத்துதல், மதுபானத்தை பதுக்கி வைத்தல் உள்ளிட்டவை கண்டறியப்பட்டால் குற்றவியல் நடவடிக்கை மேற்கொள்ளப்படும்." என்று தெரிவிக்கப்பட்டுள்ளது.