சென்னை புழல் சிறையில் இருந்து தப்பிச் சென்ற இரண்டு கைதிகளில், நேபாளத்தைச் சேர்ந்த சுதீப் போகதியை காவலர்கள் மீண்டும் கைது செய்துள்ளனர். ஆயுள் தண்டனை அனுபவித்து வரும் சுரேஷ் என்ற மற்றொரு கைதியைப் பிடிக்கத் தீவிர தேடுதல் வேட்டை நடைபெற்று வருகிறது. சிறையின் பாதுகாப்பையும் மீறி கைதிகள் தப்பிச் சென்ற சம்பவம் பரபரப்பை ஏற்படுத்தியுள்ளது.சென்னை புழல் சிறையில் 3,300-க்கும் மேற்பட்ட விசாரணைக் கைதிகள் அடைக்கப்பட்டுள்ளனர்.

சிறை நடைமுறைகளின்படி, கைதிகள் காலையில் தங்களது அறைகளில் இருந்து வெளியே வர அனுமதிக்கப்படுவார்கள். பின்னர் மாலை 6 மணியளவில் அனைவரும் மீண்டும் அவரவர் அறைகளில் அடைக்கப்படுவது வழக்கம்.அந்த வகையில், நேற்று மாலை கைதிகளின் எண்ணிக்கையைச் சிறைக் காவலர்கள் வழக்கம்போல் சரிபார்த்தனர்.

அப்போது நேபாளத்தைச் சேர்ந்த சுதீப் போகதி மற்றும் ஆயுள் தண்டனைக் கைதி சுரேஷ் ஆகிய இருவரும் காணாமல் போயிருப்பது தெரியவந்தது.இதனால் அதிர்ச்சியடைந்த சிறைக் காவலர்கள், மீண்டும் அனைத்து அறைகளிலும் கைதிகளின் எண்ணிக்கையைச் சரிபார்த்தனர். இருப்பினும், காணாமல் போன இருவரையும் கண்டுபிடிக்க முடியவில்லை. இதையடுத்து, அவர்கள் சிறையில் இருந்து தப்பிச் சென்றிருக்கலாம் என்பது உறுதியானது.

இந்த விவரம் சிறைத்துறை உயர் அதிகாரிகளுக்குத் தெரிவிக்கப்பட்டது.சிறைத்துறை அதிகாரிகளின் உத்தரவின்பேரில், புழல் சிறை வளாகம் முழுவதும் கைதிகளைத் தேடும் பணி முடுக்கிவிடப்பட்டது. தப்பிச் சென்ற இருவரையும் விரைவாகப் பிடிப்பதற்காக 14 தனிப்படைகள் அமைக்கப்பட்டு, காவலர்கள் தீவிர தேடுதல் பணியில் ஈடுபட்டனர்.

இதற்கிடையே, நேபாளத்தைச் சேர்ந்த சுதீப் போகதி சென்னை அண்ணாநகர் பகுதியில் இருப்பதாகக் காவலர்களுக்குத் தகவல் கிடைத்தது. இதையடுத்து, அங்கு விரைந்து சென்ற காவலர்கள் அவரைப் பிடித்துக் கைது செய்தனர்.சுதீப் போகதி மீண்டும் கைது செய்யப்பட்டுள்ள நிலையில், தப்பிச் சென்ற மற்றொரு கைதியான சுரேஷைத் தேடும் பணி தொடர்ந்து நடைபெற்று வருகிறது.

அவரைப் பிடிப்பதற்காகத் தனிப்படைக் காவலர்கள் பல்வேறு இடங்களில் தீவிரமாகத் தேடி வருகின்றனர்.பாதுகாப்பு நிறைந்த புழல் சிறையில் இருந்து இரண்டு கைதிகள் தப்பிச் சென்றதும், அவர்களில் ஒருவர் மீண்டும் பிடிபட்டதும் சிறைத்துறை வட்டாரத்தில் பரபரப்பை ஏற்படுத்தியுள்ளது.