தூத்துக்குடியில் கொடூர விபத்து...! நேருக்கு நேர் மோதிய லாரி மற்றும் பைக்...! - இளம் அதிகாரி உயிரிழந்த துயரம்

தூத்துக்குடியில் நடந்த கொடூர சாலை விபத்து, ஒரு இளம் உயிரை பறித்து பெரும் சோகத்தை ஏற்படுத்தியுள்ளது. பூபாலராயபுரத்தைச் சேர்ந்த சந்தனசுடலைமணி (22), தனியார் கோல்டு ஃபைனான்ஸ் நிறுவனத்தில் மேலாளராக பணியாற்றி வந்தார்.

நேற்று பணிக்காக குளத்தூர் பகுதிக்கு சென்ற அவர், பின்னர் இருசக்கர வாகனத்தில் தூத்துக்குடி நோக்கி திரும்பிக் கொண்டிருந்தார். தருவைகுளம் அருகே ஓட்டல் பகுதியை கடந்து செல்லும் போது, எதிரே வந்த லாரி திடீரென கட்டுப்பாட்டை இழந்து, அவரது வாகனத்தில் நேருக்கு நேர் மோதியது.

இந்த மோதி ஏற்பட்ட தாக்கத்தில், அவர் சாலையில் தூக்கி வீசப்பட்டு பலத்த காயங்களுடன் சம்பவ இடத்திலேயே உயிரிழந்தார்.

இந்த தகவல் கிடைத்ததும் காவலர்கள் உடனடியாக சம்பவ இடத்துக்கு சென்று, உடலை கைப்பற்றி பிரேதப் பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர்.

இந்த விபத்துக்கு காரணமான லாரி ஓட்டுநர் முனியசாமி (25) காவலர்களால் கைது செய்யப்பட்டு விசாரணை நடத்தப்பட்டு வருகிறது.

மேலும், இளம் வயதிலேயே பொறுப்பான பணியில் இருந்த சந்தனசுடலைமணியின் திடீர் மரணம், அவரது குடும்பத்தினரையும், பகுதி மக்களையும் ஆழ்ந்த துயரத்தில் ஆழ்த்தியுள்ளது.