உலகக்கோப்பை தொடரில் மும்பை வான்கடே மைதானத்தில் நேற்று நடைபெற்ற லீக் ஆட்டத்தில் இந்திய அணிக்கு எதிரான ஆட்டத்தில் இலங்கை அணி மிக மிக மோசமான ஒரு தோல்வியை சந்தித்தது.

இந்திய அணி நிர்ணயித்த 358 ரன் என்ற இமாலய இலக்கின் 7-ல் ஒரு பங்கை மட்டுமே இலங்கை அணி எடுத்தது. இந்திய வேகப்பந்து வீச்சாளர் முகமது சமி 5 விக்கெட்டும், முகமது சிராஜ் 3 விக்கெட்டும், பும்ரா ஒரு விக்கெட்டும் வீழ்த்தி இலங்கை அணியை வெறும் 55 ரன்னில் சுருட்டினர்.

இந்த ஆட்டத்தில் பும்ரா தந்து முதல் பந்திலேயே இலங்கை அணியின் தொடக்க ஆட்டக்காரர் நிசாங்காவை எல்.பி.டபிள்யூ மூலம் வீழ்த்தினார். 

48 வருட உலகக் கோப்பை வரலாற்றில், ஆட்டத்தின் முதல் பந்திலேயே விக்கெட் வீழ்த்திய இந்திய பந்து வீச்சாளர் என்ற பெருமையையும், சாதனையையும் பும்ரா படைத்துள்ளார். 

உலக கோப்பை தொடரில் எந்த பந்து வீச்சாளரும் இதற்கு முன் ஆட்டத்தின் முதல் பந்திலேயே விக்கெட் வீழ்த்தியது இல்லை. 

இந்த ஆட்டத்தின் நாயகனாக தேர்வு செய்யப்பட்டுள்ள முகமது ஷமியும் மகத்தான சாதனை ஒன்றை படைத்துள்ளார். 

உலகக்கோப்பை வரலாற்றில் முகமது ஷமி மூன்றாவது முறையாக 5 விக்கெட்டுகளை வீழ்த்தி சாதனை படைத்துள்ளார். 

இதன் மூலம் அதிக முறை 5 விக்கெட்டுகளை வீழ்த்திய வீரர்கள் பட்டியலில் முதலிடத்தில் உள்ள மிட்செல் ஸ்டார்கின் சாதனையை முகமது சாமி சமன் செய்துள்ளார். 

தொடர்ச்சியாக 7வது வெற்றியை பதிவு செய்த இந்திய அணி, முதல் அணியாக அரையிறுதிக்கு தகுதி பெற்றுள்ளது குறிப்பிடத்தக்கது.