அறுபடை வீடுகளில் இரண்டாவது புனிதத் தலமாக விளங்கும் திருச்செந்தூர் சுப்பிரமணிய சுவாமி கோவில் இன்று பக்தர்களின் பெருந்திரளால் ஆன்மிகக் களமாக மாறியது. ஞாயிறு விடுமுறை நாளை முன்னிட்டு மாநிலத்தின் பல்வேறு பகுதிகளில் இருந்து ஆயிரக்கணக்கான பக்தர்கள் கோவிலுக்கு திரண்டு வந்து முருகப்பெருமானை தரிசித்து வழிபட்டனர்.

பொதுவாக விடுமுறை நாட்கள் மட்டுமல்லாது முக்கிய விழாக்கள் நடைபெறும் காலங்களிலும் திருச்செந்தூர் கோவில் பக்தர்களின் கூட்டம் நிரம்பி வழியும்.

அந்த மரபுப்படி, பல பக்தர்கள் பாதயாத்திரையாகவும், சிலர் வாகனங்களில் குடும்பத்துடன் வந்து கடலில் புனித நீராடி, பின்னர் புகழ்பெற்ற நாழிக் கிணறு தீர்த்தத்தில் நீராடி ஆன்மிக உற்சாகத்துடன் சாமி தரிசனம் செய்யும் வழக்கம் தொடர்கிறது.

இன்றைய தினமும் அதிகாலை முதலே கோவில் வளாகம் பக்தர்களின் பக்தி முழக்கங்களால் முழங்கியது. காலை 5 மணிக்கு கோவில் நடை திறக்கப்பட்டு, 5.30 மணிக்கு விஸ்வரூப தரிசனம் நடைபெற்றது. தொடர்ந்து காலை 6 மணிக்கு உதய மார்த்தாண்ட அபிஷேகம் நடைபெற்று சிறப்பு பூஜைகள் நடைபெற்றன.

இதையடுத்து மாநிலத்தின் பல்வேறு பகுதிகளில் இருந்து வந்த ஏராளமான பக்தர்கள் கடலில் மற்றும் நாழிக்கிணறு புனித தீர்த்தத்தில் நீராடி, நீண்ட வரிசையில் சுமார் மூன்று மணி நேரத்துக்கும் மேல் காத்திருந்து முருகப்பெருமானை தரிசித்து மனநிறைவுடன் திரும்பிச் சென்றனர்.